Ýaşulularyň halkara güni mynasybetli welaýatymyzda geçirilen dabaralar ruhubelentlige beslendi. Il sylagly ýaşulular, kümüş saçly eneler, zähmet weteranlary welaýat häkimliginiň welaýat medeniýet müdirligi we jemgyýetçilik guramalary bilen bilelikde geçiren dabarasynyň arzyly myhmanlary boldular.  Welaýat häkimliginiň mejlisler jaýynda geçirilen aýdym-sazly maslahatda çykyş edenler ajaýyp zamananyň bagtyýar ýaşulularyny baýramçylyk bilen gutladylar. Hormatly Prezidentimiziň parasatly baştutanlygynda Berkarar döwletiň täze eýýamynyň Galkynyşy döwründe ýaşululara goýulýan hormat-sarpa barada giňişleýin gürrüň etdiler. Il sylagly ýaşulular, mährem eneler özleri hakda edilýän alada üçin Gahryman Arkadagymyza, Arkadagly Gahryman Serdarymyza hoşallyk bildirdiler. Milli Liderimize, hormatly Prezidentimize berk jan saglyk, uzak ömür, il-ýurt bähbitli tutumly işleriniň rowaçlyklara beslenmegini arzuw etdiler.

         Baýramçylyk çäresi Balkanabat şäherindäki «Türkmeniň ak öýi» binasynyň öňündäki meýdançada aýdym-sazlar bilen dowam etdi. Onda welaýat medeniýet müdirliginiň, Balkanabat şäher medeniýet merkeziniň sungat ussatlarynyň, welaýat ýörite sungat mekdebiniň talyplarynyň çykyşlaryna giň orun berildi. Olaryň täze taryhy döwrümizi, Gahryman Arkadagymyzyň, Arkadagly Gahryman Serdarymyzyň il-ýurt bähbitli işlerini, dana gojalarymyzy, mährem enelerimizi wasp edip ýerine ýetiren aýdym-sazlary belentden ýaňlandy. Tans, folklor toparlarynyň buýsançly çykyşlary ajaýyp zamananyň bagtyýar gojalarynyň we eneleriň göwünlerini joşa getirdi, olary has-da galkyndyrdy.

         Dabaranyň dowamynda il sylagly ýaşululara we kümüş saçly enelere ýadygärlik sowgatlary gowşuryldy. 

Türkmenistanyň Halk maslahatynyň nobatdaky mejlisiniň taryhy-syýasy ähmiýetini wagyz etmek maksady bilen welaýat häkimliginiň guramagynda «Türkmen halkynyň milli Lideriniň nusgalyk döwlet taglymaty we Arkadagly Gahryman Serdarymyzyň baştutanlygynda ösüşiň demokratik ýoly bilen beýik geljege tarap» atly dabaraly maslahat geçirildi.

Welaýat häkimliginiň mejlisler jaýynda geçirilen maslahata welaýat halk maslahatynyň agzalary, bilim, medeniýet, saglygy goraýyş we beýleki ulgamlaryň işgärleri, jemgyýetçilik guramalaryň wekilleri, il sylagly ýaşulular, kümüş saçly eneler we talyp ýaşlar gatnaşdylar.

Dabaraly çärede Türkmenistanyň Halk maslahatynyň mejlisinde kabul edilen çözgütler hakynda giňişleýin gürrüň edildi. Döwlet Baştutanymyzyň alyp barýan beýik işleriniň diňe halkyň bähbidine gönükdirilýändigi barada buýsançly bilen bellenildi. Şeýle-de Watany söýmegiň beýik nusgasyny görkezýän Gahryman Arkadagymyzyň Halk maslahatynda eden taryhy çykyşynda: «Bagtly bolmak üçin Watany söýmek gerek. Edebiň ýagşysy hem Watany söýmekdir. Çünki Watany söýmek — bu Watanyň asudalygy, gülläp ösüşi üçin zähmet çekmekdir, yhlas etmekdir. Şoňa görä-de, Watana, halka hyzmat edip, sylag-hormata mynasyp bolmak her bir ynsan üçin mukaddes borçdur, belent mertebedir. Sebäbi kim Watany depesine täç eýlese, Watany hem ony başyna täç eýlär» diýen sözleriniň halkymyz üçin hemişelik ýörelgedigini öwran-öwran nygtadylar. Döwletimizi ösüşiň täze belentliklerine alyp gitmekde, dünýä döwletleri bilen özara bähbitli gatnaşyklary ösdürmekde beýik başlangyçlara badalga berýän Gahryman Arkadagymyza we Arkadagly Gahryman Serdarymyza tüýs ýürekden alkyş aýdyldy. Uly ösüşlere beslenýän ata Watanymyzyň, döwrümiziň, Gahryman Arkadagymyzyň we hormatly Prezidentimiziň il-ýurt bähbitli işleriniň waspy şirin owazly aýdym-sazlarda ýetirildi.