Balkanabat şäherindäki «Türkmeniň ak öýi» binasynda Türkmenistanyň Zenanlar birleşiginiň Merkezi geňeşiniň, Türkmenistanyň Kärdeşler arkalaşyklarynyň Milli merkeziniň bilelikde yglan eden «Hünärim bar — hormatym bar» atly bäsleşiginiň welaýat tapgyry geçirildi.

Türkmen zenanlarynyň nusgalyk ýoluny dowam etdirýän, edara-kärhanalarda zähmet çekmek bilen birlikde, tikinçilik bilen yzygiderli meşgullanýan, milli egin-eşiklerimizi biçmekde hem tikmekde görelde görkezýän tikinçi zenanlaryň arasynda yglan edilen bäsleşigiň welaýat tapgyryna onuň deslapky tapgyrlarynda ýeňiji bolan gelin-gyzlar gatnaşdylar. Çeper elli zenanlaryň tikinçilik sungatyna bolan yhlas-başarnygyny açyp görkezmek, olaryň hünär ussatlygyny has-da kämilleşdirmek, zähmet öndürijiligini artdyrmak, ata Watanymyza, Gahryman Arkadagymyza we Arkadagly Gahryman Serdarymyza bolan belent söýgi-buýsançlaryny wagyz etmek bäsleşigiň esasy maksady boldy.

«Hünärim bar — hormatym bar» atly bäsleşigiň şertlerine laýyklykda, oňa gatnaşyjylar ýurdumyzda işlemäge, hünär öwrenmäge, telekeçilik bilen meşgullanmaga döredilýän ajaýyp şert-mümkinçilikler hem-de tikýän egin-eşikleriniň milliligi, aýratynlygy barada gürrüň berdiler. Bellenilen wagt aralygynda gyzjagazlara köýnek biçmekde, tikmekde öz ezberliklerini görkezdiler. Ýeň-ýakalara salynýan nagyşlary we olaryň şekilleriniň aýratynlyklaryny, aňladýan manylaryny, köýnek tikmekde matalaryň saýlanylyşyny, biçilişini we tikilişini goşgularda, gazallarda beýan etdiler. Türkmen zenanlarynyň görelde mekdebine öwrülen Ogulabat ejäniň döreden amaly-haşam sungatynyň nusgalaryndan ugur alyp, öz tiken döwrebap milli türkmen lybaslarynyň görkezilişini guradylar. Milli gymmatlyklarymyzyň, lybaslarymyzyň waspyny rowaýatlaryň, gazallaryň üsti bilen ýetirdiler.

Gyzykly hem täsirli geçen, milli lybaslarymyza, däp-dessurlarymyza buýsanjy artdyran bäsleşigiň jemi jemlenilende, Bereket etrabyndaky 7-nji çagalar bagynyň terbiýeçisi Gültäç Aşyrowa, şol etrabyň 4-nji çagalar bagynyň terbiýeçisi Tylla Guljykowa we Bereket tikin kärhanasynyň tikinçisi Aýjahan Amanowa birinji orunlara mynasyp boldular. Ikinji orunlary Gyzylarbat etrabynyň «Maral» tikinçilik öýüniň tikinçileri Tawus Çaryýewa, Maýsa Welmyradowa, Şemşat Durdyýewa, üçünji orunlary Türkmenbaşy etrabyndaky 3-nji çagalar bagynyň müdiri Gurbanbibi Esenowa, terbiýeçisi Gülşat Berdinýazowa we aýdym-saz mugallymy Nurgözel Mergenowa eýelemegi başardylar. Birinji orna mynasyp bolanlar bu bäsleşigiň döwlet tapgyryna gatnaşmaga hukuk gazandylar.

Bäsleşige ýeňijilerine Türkmenistanyň Kärdeşler arkalaşyklarynyň welaýat birleşmesiniň Hormat hatlary we sowgatlary dabaraly ýagdaýda gowşuryldy.

Balkanabat şäherindäki «Türkmeniň ak öýi» binasynda Türkmenistanyň Zenanlar birleşiginiň Merkezi geňeşi tarapyndan yglan edilen «Ýylyň zenany» atly bäsleşigiň Balkanabat şäher tapgyry geçirilip, oňa dürli ulgamlarda zähmet çekýän öňdebaryjy zenanlar gatnaşdylar.

Ýurdumyzda maşgala gymmatlygyna goýulýan sarpany beýan etmegi, eneligi we çagalygy goramagy, ýaş nesillerimizde milli ruhy gymmatlyklarymyza söýgini artdyrmagy, Türkmenistanda gender deňligi boýunça alnyp barylýan işleri, zenanlara goýulýan hormaty açyp görkezmegi, olaryň tekliplerini öwrenmegi we goldamagy, ýetilen belent sepgitleri wagyz etmegi maksat edinen bäsleşikde oňa gatnaşanlar dürli ugurlar boýunça öz ukyp-başarnyklaryny görkezdiler.

Netijede, çagalar we ýetginjekler döredijilik öýüniň müdiri Güljemal Soltanowa «Ýylyň işewür zenany», 18-nji çagalar bagynyň aýdym-saz mugallymy Jumasoltan Atabaýewa «Ýylyň çeper elli zenany», 2-nji çagalar sungat mekdebiniň mugallymy Güljemal Nepesgulyýewa «Ýylyň sungatda işjeň zenany», «Türkmennebit» döwlet konserniniň Balkanabat nebitçilik orta hünär okuw mekdebiniň mugallymy Toýbibi Atanyýazowa «Ýylyň mährem zenany», harby gullukçy Orazgül Mejidowa «Ýylyň watançy zenany», telekeçi Aýsona Nazgulyýewa «Ýylyň tikinçi zenany», 24-nji orta mekdebiň mugallymy Bossantäç Möwlamowa «Ýylyň halypa zenany» diýen atlara mynasyp boldular. Olar bäsleşigiň welaýat tapgyryna gatnaşmaga hukuk gazandylar.

Welaýat häkimliginde Türkmenistanyň Zenanlar birleşiginiň welaýat bölüminiň hasabat ýygnagy geçirildi. Oňa Zenanlar birleşiginiň welaýat bölüminiň, etrap-şäher geňeşleriniň wekilleri, ilkinji zenanlar guramalarynyň işjeň agzalary, mährem eneler we ýaşlar gatnaşdylar.

 Ýygnagyň dowamynda edilen çykyşlarda bellenilişi ýaly, Berkarar döwletiň täze eýýamynyň Galkynyşy döwründe zenanlaryň çekýän asylly zähmetine ýokary baha berilýär, zenan sarpasy belentde tutulýar. Türkmenistanyň Zenanlar birleşiginiň Merkezi geňeşiniň we Türkmenistanyň Kärdeşler arkalaşyklarynyň Milli merkeziniň birleşen tagallasy bilen yglan edilýän bäsleşikler, maslahatlar, wagyz-ündew çäreleri biri-birine ulaşýar. Zenanlar birleşiginiň welaýat bölümi we etrap-şäher geňeşleri şeýle çäreleri edara-kärhanalarda we halk köpçüliginiň arasynda geçirip, aýal-gyzlaryň ukyp-başarnyklaryny ýüze çykarmakda tagallalaryny gaýgyranoklar. Çünki Türkmenistanyň Zenanlar birleşiginiň işini döwrüň talabyna laýyk kämilleşdirmek ýurdumyzda öňe sürülýän esasy talaplaryň biri bolup durýar. Häzirki wagtda  Zenanlar birleşiginiň, şol sanda onuň welaýat bölüminiň öňündäki möhüm wezipeler zenanlaryň ýurdumyzyň jemgyýetçilik durmuşyna mundan beýläk-de işjeň gatnaşmagyny üpjün etmekden, eneligi we çagalygy goramak boýunça alnyp barylýan işleriň netijeliligini ýokarlandyrmakdan, köp çagaly eneleriň ýaşaýyş şertleri baradaky aladany güýçlendirmekden, olary maddy taýdan goldamakdan we beýleki zerur kömekleri bermekden ybaratdyr.

Şular dogrusynda giňişleýin gürrüň edilen hasabat ýygnagynda geçen ýylyň dowamynda durmuşa geçirilen işlere seljerme berildi. Halkara parahatçylyk we ynanyşmak ýylynda amala aşyrylmaly işler ara alnyp maslahatlaşyldy. Zenanlar birleşiginiň welaýat bölüminiň agza sanynyň yzygiderli artýandygy göz öňünde tutulyp, onuň guramaçylyk toparynyň düzümine hem seredildi.

Öý-ojaklarymyzyň ýaraşygy hasaplanylýan zenanlaryň, eneleriň bagtyýarlygy barada uly aladalary edýän Gahryman Arkadagymyza we Arkadagly Gahryman Serdarymyza alkyşlar çärede edilen çykyşlarda dilleriň senasyna öwrüldi.

Watan goragçylarynyň güni mynasybetli Balkanabat şäherinde welaýat Polisiýa müdirliginiň işgärleri üçin döwrebap ýaşaýyş jaýlarynyň ulanmaga berilmegi şatlyk-şowhuna beslendi. Belentde parlaýan ýaşyl Tugumyz, dürli öwüşginli baýdajyklar, şarlar, ak öýleriň owadan hatary baýramçylyk meýdançasyna bezeg berip, sahna oýunlary, sport çäreleri dabaranyň şowhunyny  artdyrdy. Hatara düzülen toý gazanlarynda milli tagamlar taýýarlandy.

Dabarada çykyş edenler bu ýere ýygnananlary Watan goragçylarynyň güni hem-de ýaşaýyş jaýlarynyň ulanyşa tabşyrylmagy bilen gutladylar. Türkmenistanyň Senagatçylar we telekeçiler birleşmesiniň agzasy «Alawly türkmen» hususy kärhanasynyň gurluşykçylaryna hormatly Prezidentimiziň adyndan gymmatbahaly sowgatlar gowşuryldy. Döwrebap jaýlara göçüp gelen raýatlara öýleriň açarlarynyň gowşurylmagy dabaranyň täsirli pursatlarynyň üstüni ýetirdi. Sungat ussatlarynyň aýdym-sazlarynda ýurdumyzda durmuşa geçirilýän beýik işleriň, hemişelik Bitaraplygymyzyň waspy ýetirildi.

Dabara gatnaşanlar iki sany dört gatly, her biri 32 hojalyga niýetlenen jaýlaryň üç hem-de dört otagly öýlerinde döredilen amatlyklar, otaglaryň durmuş maksatly enjamlar bilen üpjünçiligi bilen tanyşdylar.

Arkadagly Gahryman Serdarymyzyň «Magtymguly — dünýäniň akyldary» atly kitabynyň welaýat häkimliginiň mejlisler jaýynda geçirilen tanyşdyrylyş dabarasy Gündogaryň beýik söz ussady Magtymguly Pyraga we onuň  tutuş adamzadyň ylham çeşmesine öwrülen döredijiligine goýulýan hormat-sarpanyň aýdyň kepili bolup, ýokary ruhubelentlige beslendi. Welaýat we Balkanabat şäher häkimlikleriniň, jemgyýetçilik guramalarynyň wekilleriniň, edara-kärhanalaryň işgärleriniň, il sylagly ýaşulularyň, mährem eneleriň, bagtyýar ýaşlaryň gatnaşmagynda geçirilen tanyşdyrylyş dabarasynda döwlet Baştutanymyzyň täze kitabynyň ägirt uly ähmiýeti dogrusynda giňişleýin gürrüň edildi.

Tanyşdyrylyş dabarasynda çykyş edenleriň nygtaýyşlary ýaly, Berkarar döwletiň täze eýýamynyň Galkynyşy döwründe Gahryman Arkadagymyzyň, Arkadagly Gahryman Serdarymyzyň taýsyz tagallalary bilen beýik akyldaryň edebi mirasyny öwrenmek, dünýäde wagyz etmek boýunça uly işler durmuşa geçirilýär. Geçen ýylyň «Pähim-paýhas ummany Magtymguly Pyragy» ýyly diýlip atlandyrylmagy, dana şahyryň doglan gününiň  300 ýyllyk ýubileýiniň dünýä boýunça dabaraly bellenilmegi we beýleki çäreler munuň subutnamalarydyr. Hormatly Prezidentimiziň täze kitabynyň şöhratly wakalary bilen bilen taryha giren «Pähim-paýhas ummany Magtymguly Pyragy» ýylynda halkymyza peşgeş bermegi  aýratyn many-mazmuna eýe bolup, ajaýyp sazlaşygy emele getirýär.  Mähriban halkymyz üçin bahasyna ýetip bolmajak gollanma, ruhy hazyna bolan kitapda Magtymgulyny öwreniş ylmynyň döreýşi we ösüşi, akyldaryň edebi mirasyny öwrenmegiň we öwretmegiň usullary, beýik söz ussadynyň döredijiligini dünýäde wagyz etmek boýunça alnyp barlan işler öz beýanyny tapýar. Dabarada merdana halkymyza ajaýyp serpaý ýapan Arkadagly Gahryman Serdarymyza aýdylan hoşallyk sözleri ýürek buýsanjy bolup ýaňlandy.

Sungat ussatlarynyň ýerine ýetiren çykyşlary dabara aýratyn öwüşgin çaýdy. Täze taryhy döwrüň bedew batly ösüşlerini, parahatçylygy, asuda durmuşy wasp edýän aýdymlar, şeýle-de beýik söz ussadynyň şygyrlaryna döredilen aýdymlar belentden ýaňlandy.

Tanyşdyrylyş dabarasynyň ahyrynda hormatly Prezidentimiziň adyna Ýüzlenme kabul edildi.