Welaýat häkimliginiň, Türkmenistanyň Zenanlar birleşiginiň welaýat bölüminiň, Türkmenistanyň Agrar partiýasynyň welaýat komitetiniň Balkanabat şäherindäki «Türkmeniň Ak öýi» binasynyň ajaýyp meýdançasynda Hasyl toýy mynasybetli guran baýramçylyk dabarasy çuň many-mazmuna eýe boldy. Giňden guralan toý çäresi welaýatymyzyň ussat babadaýhanlarynyň, ýaşuly nesliň wekilleriniň, talyp-ýaşlarynyň, medeniýet, saglygy goraýyş, bilim we sport ulgamlarynyň işgärleriniň  gatnaşmagynda dabaraly baýramçylyk ýörişi bilen başlandy.  

Hasyl toýy mynasybetli Hormatly Prezidentimiziň Garaşsyz, hemişelik Bitarap Türkmenistanyň edermen oba zähmetkeşlerine, hasyl ussatlaryna we ähli halkyna iberen Gutlagyndan ruhlanan ildeşlerimiz bu ýerde çykyş edip, Arkadagly Gahryman Serdarymyzyň howandarlygynda ýurdumyzyň oba hojalyk toplumynyň düýpli galkynyşa eýe bolýandygyny aýratyn buýsanç bilen nygtadylar. Munuň üçin Gahryman Arkadagymyza hem-de Arkadagly Gahryman Serdarymyza tüýs ýürekden hoşallyklaryny beýan etdiler. Belentden tutulan baýramçylyk çäresiniň dowamynda welaýatyň oba hojalyk pudagynyň öňdebaryjylarynyň uly toparyna  hormatly Prezidentimiziň adyndan gymmatbahaly baýramçylyk sowgatlary dabaraly ýagdaýda gowşuryldy.   

Welaýatyň medeniýet we sungat ussatlarynyň  buýsançly çykyşlarynda Gahryman Arkadagymyzyň hem-de Arkadagly Gahryman Serdarymyzyň amala aşyrýan beýik işleriniň, sapaly durmuşymyzyň, ajaýyp döwrümiziň, daýhan zähmetiniň  tarypyny ýetirýän aýdymlar belentden ýaňlandy. Bu ýerde guralan oba hojalyk önümleriniň sergisinde ekerançylyga degişli milli däp-dessurlar, azyk önümleriniň taýýarlanylyşy  görkezildi.

Dabaranyň geçýän ýerinde «Bereketli türkmen saçagy» atly kitap esasynda geçirilen bäsleşige welaýatymyzyň edara-kärhanalarynyň aşpezleri höwes bilen gatnaşyp, türkmen halkynyň milli tagamlaryny, işdäaçarlary ýokary derejede taýýarlamagyň inçe tilsimlerini açyp görkezdiler. Gahryman Arkadagymyzyň «Türkmenistanyň dermanlyk ösümlikleri» atly köp jiltli ylmy-ensiklopedik  kitabyna salgylanyp taýýarlanylan melhemlik içgiler dabara gatnaşyjylara hödür edildi.  

Ýurdumyzy bagy-bossanlyga öwürmek, onuň gözel  tebigatyny has-da baýlaşdyrmak maksady bilen geçirilen ählihalk bag ekmek dabarasynyň güýzki möwsüminiň esasy çäresi welaýatymyz boýunça Türkmenbaşy şäheriniň Awaza etrabynyň çäginde ýörite bellenen meýdanda guramaçylykly geçirildi. Köpçülikleýin çärä bilim, medeniýet, saglygy goraýyş, sport we beýleki ulgamlaryň işgärleri, jemgyýetçilik guramalarynyň agzalary, ýaşuly nesliň wekilleri, edara-kärhanalaryň zähmet toparlary hem-de talyp ýaşlar ýokary ruhubelentlikde gatnaşdylar. Bu ýerde çykyş edenler halkymyzyň bagtyýarlygy, Watanymyzyň has-da kuwwatlanmagy, Diýarymyzyň bagy-bossanlyga öwrülmegi babatda edýän taýsyz tagallalary üçin hormatly Prezidentimize hem-de  Gahryman Arkadagymyza tüýs  ýürekden alkyş  sözlerini aýtdylar.

            Ählihalk bag ekmek dabarasynda baglaryň ilkinji nahallaryny oturtmaklygyň ýaşuly nesliň wekillerine, ýaş çatynjalara  hem-de röwşen geljegimiziň eýeleri bolan körpelere ynanylmagy çuň many-mazmuna eýe boldy. Medeniýet we sungat ussatlarynyň ýerine ýetiren  döwrebap aýdym-sazlary hem-de talyp ýaşlaryň joşgunly  çykyşlary bag nahallaryny oturtmak üçin ýygnanan adamlara ruhy lezzet paýlady. Belentden ýaňlanan aýdym-sazlarda Berkarar döwletiň täze eýýamynyň Galkynyşy döwrüniň, Halkara parahatçylyk we ynanyşmak ýylynyň rowaç tutumlarynyň, erkana durmuşymyzyň, tebigat gözellikleriniň waspy ýetirildi.  

           Dabaranyň geçýän ýerinde sergiler giňden ýaýbaňlandyryldy. Olarda daýhançylyk gurallary, agaç ussalarynyň ýerine ýetiren işleri görkezildi. Ählihalk bag ekmek dabarasynyň geçýän ýerinde dürli bezeg gülleridir bag nahallarynyň, şeýle hem muzeý gymmatlyklaryndan, senetçilige, amal-haşam sungatynyň el işlerine degişli  önümlerden guralan sergiler hem aýratyn many-mazmuna eýe boldy. Sportuň dürli görnüşleri boýunça bäsleşikleri, görkezme çykyşlary guraldy.

          Zähmet baýramçylygynyň dowamynda bu ýerde pürli we saýaly bag nahallarynyň 4 müň düýbi oturdyldy we göwnejaý ideg edildi. Şol gün Awaza etrabynyň gözel künjeginde oturdylan bag nahallary täze ýaşyl zolagy emele getirdi hem-de bu ýeriň gözelligine gözellik goşdy.   

          Güýz paslynyň arassa we tämiz säherinde geçirilen köpçülikleýin çäre welaýatymyzyň ähli ýerlerini zähmet joşguny bilen gurşap aldy. Ählihalk dabarasyna gatnaşanlar şol gün öňden ösüp oturan baglarda ideg-timarlaýyş işlerini geçirip, olaryň düýplerini ýumşatdylar. Ýaş nahallaryň bolsa jemi 10 müňden gowrak düýbüni  oturtdylar. Şolaryň 8 müňden gowragy pürli we saýaly, 2 müň 200-si miweli baglaryň nahallarydyr.