«Pähim-paýhas ummany Magtymguly Pyragy»
«Pähim-paýhas ummany Magtymguly Pyragy»
BALKAN WELAÝATY
Türkmenistanyň günbatarynda ýerleşip, demirgazykda Gazagystan we Özbegistan, demirgazyk-gündogarda Daşoguz welaýaty, gündogarda Ahal welaýaty, günortada Eýran Yslam Respublikasy bilen araçäkleşýär.
Balkan adamzat siwilizasiýasynyň ilkinji ädimleri bilen gyzyklanýanlaryň hem ünsüni elmydama özüne çekip gelendir. Hut şu welaýatda, Köpetdagyň demirgazyk şahasynyň ugrunda biziň eýýamymyzdan öňki XII-VII müňýyllyklara degişli neolit we mezolit döwrüniň adamlarynyň mesgeni tapylandyr.
Welaýatymyzda
Türkmenistanyň saglygy goraýyş we derman senagaty işgärleriniň güni mynasybetli
geçirilen dabaralar uly ruhubelentlige, şatlyk-şowhuna beslendi. Mollagara şypahanasynda
geçirilen aýdym-sazly baýramçylyk çäresine saglygy goraýyş işgärleri, dürli
ulgamyň wekilleri, il sylagly ýaşulular, kümüş saçly eneler hem-de talyp ýaşlar
gatnaşdylar.
Baýramçylyk
çäresinde edilen her bir çykyşyň özenini raýatlaryň saglygyny goramakda dünýä
nusgalyk uly işleri durmuşa geçirýän Gahryman Arkadagymyza, Arkadagly Gahryman
Serdarymyza alkyş hem-de hoşallyk sözleri düzüp, olarda ýurdumyzyň saglygy goraýyş
ulgamynda hem-de derman senagatynda gazanylýan ösüşler barada giňişleýin aýdylyp
geçildi. Hormatly Prezidentimiziň parasatly baştutanlygynda öňe sürlen il-ýurt
bähbitli maksatnamalara, şol sanda «Saglyk» Döwlet maksatnamasyna laýyklykda,
milli saglygy goraýyş ulgamynyň düzümleriniň düýpli özgertmelere eýe bolandygy
hakynda giňişleýin gürrüň edilip, halkymyzyň sagdyn, eşretli durmuşda ýaşamagy
üçin taýsyz tagallalary edýän Milli Liderimiziň, döwlet Baştutanymyzyň
janlarynyň sag, ömürleriniň uzak bolmagy arzuw edildi.
Çäre
welaýatyň sungat ussatlarynyň, talyp ýaşlaryň çykyşlary bilen dowam etdi.
Ýerine ýetirilen aýdym-sazlar joşgunly tanslar bilen utgaşyp, olarda ata Watanymyzyň,
täze taryhy eýýamymyzyň, saglygy goraýyş ulgamynda gazanylýan üstünlikleriň
waspy belentden ýetirildi. Soňra çärä gatnaşanlar bu ýerde ýaýbaňlandyrylan
sergini synladylar. Sergi ýurdymyzyň saglygy goraýyş ulgamynyň ajaýyp zamanamyzda
gazanan üstünlikleri, ýeten belent sepgitleri, öňdebaryjy usullardyr hyzmatlar
bilen ýakyndan tanyşmaga mümkinçilik berdi.
Çäräniň
ahyrynda welaýatymyzyň öňdebaryjy saglygy goraýyş we derman senagaty
işgärlerine Hormat hatlary we baýramçylyk sowgatlary dabaraly ýagdaýda
gowşuryldy.
Welaýat merkezindäki «Türkmeniň ak öýi» binasynda
Türkmenistanyň Bilim ministrliginiň, Türkmenistanyň Zenanlar birleşiginiň
Merkezi geňeşiniň, Türkmenistanyň Kärdeşler arkalaşyklarynyň Milli merkeziniň,
Türkmenistanyň Telewideniýe, radiogepleşikler we kinematografiýa baradaky
döwlet komitetiniň bilelikde yglan eden «Hünärli nesil — röwşen geljek» atly bäsleşiginiň
welaýat tapgyry geçirildi.
Welaýatymyzyň orta mekdeplerindäki gyzlar gurnaklarynyň
agzalarynyň gatnaşmaklarynda geçirilen bäsleşigiň şertlerine laýyklykda, oňa
gatnaşýan gyzlar öz okaýan mekdeplerinde hereket edýän gyzlar gurnagynda
öwrenýän el işlerini hem-de milli däp-dessurlarymyza eýerişlerini aýdymlarda,
gazallarda, goşgularda wasp etdiler. Dürli el işlerini ýerine ýetirmekde, haly dokamakda öz ukyp-başarnyklaryny
görkezdiler. Saçak bezemekde, unaş kesmekde birek-birekden kem durmazlyga
çalyşdylar. «Bereketli türkmen saçagy» atly kitap esasynda tagam taýýarlanylyşy
barada gürrüň berdiler. Aýdyşyklar, nakyllar, gazallar bilen milli tagamlaryň
waspyny ýetirdiler. Özleri üçin ähli şert-mümkinçilikleri döredýän, okamaga,
öwrenmäge giň ýollary açan Gahryman Arkadagymyza we hormatly Prezidentimize
tüýs ýürekden alkyş aýtdylar.
Netijede, Bereket etrabyndaky 20-nji orta mekdebiň gyzlar
gurnagynyň topary birinji, Balkanabat şäherindäki daşary ýurt dillerine
ýöriteleşdirilen 3-nji orta mekdebiň gyzlar gurnagynyň agzalary ikinji,
Gyzylarbat etrabyndaky 18-nji orta mekdebiň gyzlar gurnagynyň topary bolsa
üçünji orunlara mynasyp boldular. Bäsleşikde birinji orny eýelän topar onuň
döwlet tapgyryna gatnaşmaga hukuk gazandy.
Ýaşulularyň
halkara güni mynasybetli welaýatymyzda geçirilen dabaralar ruhubelentlige
beslendi. Il sylagly ýaşulular, kümüş saçly eneler, zähmet weteranlary welaýat
häkimliginiň welaýat medeniýet müdirligi we jemgyýetçilik guramalary bilen
bilelikde geçiren dabarasynyň arzyly myhmanlary boldular. Welaýat häkimliginiň mejlisler jaýynda
geçirilen aýdym-sazly maslahatda çykyş edenler ajaýyp zamananyň bagtyýar
ýaşulularyny baýramçylyk bilen gutladylar. Hormatly Prezidentimiziň parasatly
baştutanlygynda Berkarar döwletiň täze eýýamynyň Galkynyşy döwründe ýaşululara
goýulýan hormat-sarpa barada giňişleýin gürrüň etdiler. Il sylagly ýaşulular,
mährem eneler özleri hakda edilýän alada üçin Gahryman Arkadagymyza, Arkadagly
Gahryman Serdarymyza hoşallyk bildirdiler. Milli Liderimize, hormatly Prezidentimize
berk jan saglyk, uzak ömür, il-ýurt bähbitli tutumly işleriniň rowaçlyklara
beslenmegini arzuw etdiler.
Baýramçylyk çäresi Balkanabat
şäherindäki «Türkmeniň ak öýi» binasynyň öňündäki meýdançada aýdym-sazlar bilen
dowam etdi. Onda welaýat medeniýet müdirliginiň, Balkanabat şäher medeniýet
merkeziniň sungat ussatlarynyň, welaýat ýörite sungat mekdebiniň talyplarynyň
çykyşlaryna giň orun berildi. Olaryň täze taryhy döwrümizi, Gahryman
Arkadagymyzyň, Arkadagly Gahryman Serdarymyzyň il-ýurt bähbitli işlerini, dana
gojalarymyzy, mährem enelerimizi wasp edip ýerine ýetiren aýdym-sazlary
belentden ýaňlandy. Tans, folklor toparlarynyň buýsançly çykyşlary ajaýyp
zamananyň bagtyýar gojalarynyň we eneleriň göwünlerini joşa getirdi, olary
has-da galkyndyrdy.
Dabaranyň dowamynda il sylagly
ýaşululara we kümüş saçly enelere ýadygärlik sowgatlary gowşuryldy.
