Welaýat saglygy dikeldiş okuw-terbiýeçilik toplumynda «Arkadag Serdarly bagtyýar ýaşlar, okaýar, döredýär ajaýyp işler» ady bilen «Açyk gapylar» güni geçirildi. Bu dabaraly çärä Balkanabat şäherindäki orta mekdeplerden, çagalar baglaryndan köp sanly myhmanlar gatnaşdylar.

Toplumyň binasynyň öňündäki açyk meýdançada ak öýler gurlup, baýramçylyk keşbine beslendi. Myhmanlar duz-çörek bilen garşy alnyp,  milli tagamlar hödürlenildi. «Açyk gapylar» gününiň açylyş dabarasyndan soňra myhmanlar toplumyň mugallymlarynyň, okuwçylarynyň el işleriniň sergisine uly gyzyklanma bilen syn etdiler. Dabara gatnaşan myhmanlar toplumyň mekdep ýaşly hem-de mekdebe çenli ýaşly çagalar bölümlerinde geçirilen açyk sapaklara gatnaşdylar. Toplumda bilim-terbiýe alýan okuwçylar türkmen halkynyň Milli Lideri Gahryman Arkadagymyza, hormatly Prezidentimiz Arkadagly Serdarymyza bimöçber hoşallyklaryny goşgularyň, aýdymlaryň üsti bilen beýan etdiler. Terbiýeçileriň, okuwçylaryň uly joşgun bilen ýerine ýetiren döwrebap küştdepdisi, şirin aýdymlary, gysgajyk sahna oýunlary çärä gatnaşanlarda uly täsir galdyrdy. Olar bu ýerde çagalaryň ýaşaýyş-durmuş şertleri, olaryň saglyklaryny dikeltmekde lukmanlar toparynyň alyp barýan işleri, çagalaryň dynç almagy, okamagy üçin döredilen giň mümkinçilikler bilen tanyş boldular.

Bütindünýä saglyk güni ýurdumyzyň welaýatymyzda hem uly dabaralar bilen bellenilip geçildi. Halkara baýram mynasybetli Balkanabat we Türkmenbaşy şäherlerinde geçirilen köpçülikleýin welosipedli ýörişleri baýramçylygyň esasy wakalary hökmünde görkezmek bolar. Welaýat derejesindäki dabaraly çäreler bolsa welaýat merkezinde geçirilip, «Türkmeniň ak öýi» binasynyň ýanynda ir säherde badalga berlen köpçülikleýin welosipedli ýöriş Gahryman Arkadagymyzyň başlangyjy bilen ýola goýlan ýörelgäniň ajaýyp zamanamyzda Arkadagly Serdarymyz tarapyndan mynasyp dowam etdirilýändigini we oňa bagtyýar raýatlarymyzyň yhlas bilen eýerýändiklerini bütin aýdyňlygy bilen görkezdi.

«Türkmeniň ak öýi» binasynyň ýanyndan «Ilkinjiler» ýadygärligine çenli dowam eden welosipedli ýörişe edara-kärhanalaryň, guramalaryň işgärleri, talyp ýaşlar, türgenler uly ruhubelentlik bilen gatnaşdylar. Ýurdumyzda welosiped sportunyň ösmegine hemişe uly üns berilýändiginiň, Gahryman Arkadagymyzyň hem-de Arkadagly Serdarymyzyň göreldesine eýerip, sport bilen meşgullanmagy gündelik durmuş endiklerine öwren raýatlarymyzyň barha köpelýändiginiň aýdyň subutnamasyna öwrülen köpçülikleýin welosipedli ýörişiň geçýän ýolunyň ugrunda welaýatymyzyň medeniýet we sungat ussatlarynyň, çeper höwesjeňleriniň aýdym-sazly  çykyşlarynyň guralmagy çäräniň şatlyk-şowhunyny has-da artdyrdy.

Halkara baýram mynasybetli Balkanabat şäherindäki köpugurly sport toplumynyň öňündäki meýdançada geçirilen aýdym-sazly dabara sporty ösdürmegiň, köpçülikleýin bedenterbiýäni, sagdyn durmuş ýörelgesini rowaçlandyrmagyň döwlet syýasatynda esasy ugurlaryň birini eýeleýändigini nobatdaky gezek görkezdi. Bu ýerde bahar paslynyň hoştap howaly ajaýyp gününde joşgunly tanslar bilen sazlaşyklylykda ýerine ýetirilen aýdymlarda Berkarar döwletiň täze eýýamynyň Galkynyşy döwründe Arkadagly Serdarymyzyň taýsyz tagallasy bilen amala aşyrylýan beýik işleriň, sagdyn durmuşyň, sportuň waspy belentden-belent ýaňlandy. Türgenleriň ýaýbaňlandyran görkezme çykyşlary bolsa sportuň dürli görnüşleri boýunça kämilleşýän ýaşlaryň barha köpelýändiginiň aýdyň subutnamasyna öwrüldi.

Gowaça ekişine başlanmagy mynasybetli welaýat häkimliginiň guramagynda geçirilen maslahatda Berkarar döwletiň täze eýýamynyň Galkynyşy döwründe ýurdumyzyň oba hojalygynda Arkadagly Serdarymyzyň geçirýän giň gerimli özgertmeleriniň oňyn netijeleri baradaky çykyşlar uly orun eýeledi. Çykyşlarda bellenilip geçilişi ýaly, hormatly Prezidentimiziň şol özgertmeleri ykdysadyýetimiziň agrosenagat toplumynda gazanylýan üstünlikleriň berk binýady bolup durýar. Ýeriň hakyky eýesini tapmak, ýer, suw serişdelerini rejeli peýdalanmak, ekerançylyk meýdanlarynyň hasyllylygyny ýokarlandyrmak, halkymyzyň ýokary hilli, ekologiýa taýdan arassa oba hojalyk önümleri bilen üpjünçiligini has-da gowulandyryp, azyk garaşsyzlygyny pugtalandyrmak şeýle özgertmelerde esasy orunda goýulýar. Agrosenagat toplumyna sanly elektron ulgamyny hem-de bazar gatnaşyklaryny işjeň ornaşdyrmak, pudakda hususyýetçileriň eýeleýän ornuny yzygiderli artdyrmak hem hemişe üns merkezinde saklanýar.

Maslahatda şular dogrusynda gürrüň edilip, ekiş işlerini öz wagtynda ýokary hilli geçirmek barada durlup geçildi. Ýer eýeleriniň öndürijilikli işlemekleri, halal zähmetiň hözirini görmekleri barada edýän aladalary, gowaça ekişine girişmäge beren ak patasy üçin Arkadagly Serdarymyzyň adyna hoşallyk sözleri aýdyldy.

Maslahatyň dowamy Gyzylarbat etrabynyň çägindäki «Batly mülkdar» daýhan hojalygynyň ekerançylyk meýdanynda gowaça ekişine badalga bermek dabarasyna utgaşdy. Döwrebap oba hojalyk tehnikalarynyň, suwaryş enjamlarynyň, türkmeniň alty ganat ak öýleriniň owadan hatarlary, taryhy gymmatlyklaryň, amaly-haşam sungatynyň, el işleriniň sergileri, hatara düzülen toý gazanlary dabaranyň geçýän ýerini baýramçylyk ruhuna besledi. Hormatly Prezidentimiziň sargydyna eýerilip, il sylagly ýaşulularyň ýagşy arzuw-dilegleri bilen gowaçanyň ilkinji tohumlary bereketli topraga sepildi. Onuň yzysüre ýokary öndürijilikli oba hojalyk tehnikalaryna erk edýän mehanizatorlar gowaça ekişine köpçülikleýin girişdiler. Möwsümiň dowamynda kuwwatly traktorlara tirkeljek ekijileriň 35-si bökdençsiz işlediler. Ýeri gelende aýtsak, balkanly daýhanlar 13 müň gektar meýdana gowaça ekip, «ak altynyň» 16 müň tonnasyny ýygnamagy maksat edinýärler.

Sungat ussatlarynyň täze taryhy eýýamyň köpugurly ösüşlerini, bagtyýar durmuşymyzy, Arkadagly Serdarymyzyň il-ýurt bähbitli beýik tutumlaryny, Arkadag Serdarly bagtyýar ýaşlar ýylyny, ene toprakdan bereket öndürýän daýhanlarymyzyň zähmet üstünliklerini taryplaýan şirin aýdym-sazlary, ussatlyk bilen ýerine ýetiren milli tanslary, halk döredijiliginden taýýarlan çykyşlary dowamly ýaňlanýan el çarpyşmalar bilen garşylandy. 

Milli bahar baýramy — Halkara Nowruz güni mynasybetli Balkanabat şäherindäki «Türkmeniň ak öýi» binasynyň öňündäki ajaýyp meýdançada tutulan dabara ýaşuly nesliň wekilleriniň, medeniýet, saglygy goraýyş we bilim ulgamlarynyň işgärleriniň, talyp ýaşlaryň gatnaşmaklarynda baýramçylyk ýörişi bilen başlandy. Oňa gatnaşyjylar dabaranyň geçýän ýerinde aýdym-sazyň şowhuny bilen mähirli garşylandy. Welaýat we Balkanabat şäher häkimlikleriniň, welaýat medeniýet müdirliginiň, Türkmenistanyň Zenanlar birleşiginiň welaýat bölüminiň bilelikde guran dabarasynda baýramçylyk gutlaglary buýsançly ýaňlandy. Çykyş edenler döwlet Baştutanymyza berk jan saglyk, uzak ömür, il-ýurt bähbitli,  dünýä ähmiýetli beýik işlerinde baky rowaçlyklar arzuw etdiler.

Baýramçylyk çäresinde welaýatymyzyň medeniýet we sungat ussatlarynyň edebi-sazly çykyşlary giňden ýaýbaňlandyryldy. Olarda türkmen tebigatynyň, bahar paslynyň waspy belentden ýetirildi. Sungat ussatlarynyň ýerine ýetirmeklerinde ýaňlanan aýdym-sazlarda, tans we folklor toparlarynyň joşgunly çykyşlarynda Gahryman Arkadagymyza, Arkadagly Serdarymyza egsilmez söýgi-buýsanç aýdyň beýanyny tapdy. Giňden ýazylan baýramçylyk saçagyny dürli tagamlar, naz-nygmatlar bezedi. Nowruz tagamlary baýramçylyga gatnaşýan adamlara hödür-kerem edildi. Amaly-haşam sungatynyň, nusgalyk el işleriniň we ýaş suratkeşleriň ajaýyp döwrümiziň buýsançly ösüşlerini aýdyň görkezýän suratlarynyň sergilerine-de uly orun berildi. Milli senetçilik, halyçylyk, zergärçilik hem-de sungatyň beýleki görnüşleri boýunça ýerleşdirilen işler köpleriň nazarynda boldy. Bu ýerde zenanlaryň el hünärini mahabatlandyrýan, milli medeni mirasymyzy şöhlelendirýän ümeçilik dessury döwrebap derejede açylyp görkezildi. Biri-birine utgaşan çykyşlarda şahandaz ildeşlerimiz ýürek buýsançlaryny gazallaryň, küştdepdileriň üsti bilen joşgunly beýan etdiler. Sapaly durmuşymyzyň, türkmen tebigatynyň, ajaýyp döwrümiziň, daýhan zähmetiniň tarypyny ýetirýän hoş owazly aýdymlar çar tarapa ýaň saldy.

Balkanabat şäherinde we welaýatymyzyň etrap-şäherlerinde Milli bahar baýramynyň iki günläp dowam eden toý çäreleri gadymy baýramçylygyň kämil däpleriniň ajaýyp zamanamyzda dowamat-dowamdygyny görkezdi.

Milli bahar baýramynyň — Halkara Nowruz gününiň çuň mazmunly dabaralary welaýatymyzda ýokary guramaçylyga beslendi. Geçen ýylyň jemleri boýunça ýurdumyzyň iň gowy etraby diýlip yglan edilen we Arkadagly Serdarymyzyň Şa serpaýyna mynasyp bolan Magtymguly etrabynyň gözel künjeklerinde biri-birine ulaşan baýramçylyk dabaralary muny aýdyň görkezdi.

Beýik söz ussadynyň adyny uly hormat bilen göterýän etrabyň ýaşyl begres geýnen, Akderek diýlip atlandyrylýan ýaýlasynda welaýat derejesinde guralan dabara baýramçylyk ýörişinden başlandy. Ýörişe gatnaşýan dürli ýaşdaky adamlar, elleri bugdaý maýsaly zenanlar, bagtyýar çagalar, medeniýet we sungat ussatlary, şeýle-de köp sanly myhmanlar aýdym-sazlaryň şowhuny astynda toý dabarasynyň geçýän ýerine geldiler. Bu ýerde olar duz-çörek, göwün göteriji, joşgunly aýdym-sazlaryň hoş owazy bilen garşylandy.

Baýramçylyk dabarasynyň geçýän ýeri hakyky türkmen obasyny ýadyňa salýar. Aga-ýana otlap ýören dowar sürüleri, olary örän sak goraýan türkmen alabaýlary, owlak-guzularyň naşyja sesleri, gündelik durmuş aladalaryna ulaşan zähmetkeş adamlar — bularyň ählisi türkmen obasynyň özboluşly keşbini janlandyryp, synlanlarda durmuşa söýgini has-da joşdurdy. Giňden ýaýbaňlandyrylan aýdym-sazly çykyşlar dabaranyň möhüm bölegine öwrüldi.

Soňra dabara sebite mahsus täsin miweli baglary, dürli görnüşli ösümlikleri bolan S.A.Nyýazow adyndaky Türkmen oba hojalyk uniwersitetiniň Magtymguly ylmy-önümçilik synag merkeziniň çäginde dowam etdi. Bu ýerde türkmen halkynyň Nowruz baýramyny toýlamakda gadymdan gelýän hem-de kämilligiň belentliklerine göterilýän özboluşly toý dessurlary berjaý edildi. Giňden ýazylan bereketli toý saçagyny türkmen toýlaryna mahsus naz-nygmatlar hem-de Nowruz tagamlary bezedi. Bu ýerde guralan sergilerde ýerleşdirilen, irki döwürlerde daýhanlaryň ulanan zähmet gurallary, gap-gaçlaryň dürli görnüşleri ekerançylygyň taryhyna gaýybana syýahat etmäge mümkinçilik berdi.

Belentden ýaňlanan aýdym-sazlara, joşgunly tanslara, halk döredijiliginiň köp öwüşginli çykyşlaryna beslenen Milli bahar baýramynyň dabarasy uzak wagtlap dowam edip, welaýatymyzyň bagtyýar ilatynyň milli ruhy ýörelgelerimize, ýokary ynsanperwerlik gymmatlyklarymyza hemişe ygrarly bolmak bilen, täze taryhy eýýamda Arkadagly Serdarymyzyň baştutanlygynda bu ýörelgeleri has-da baýlaşdyrýandygyny ýene bir ýola tassyklady.