Her ýylyň 3-nji iýunynda giňden bellenilip geçilýän Bütindünýä welosiped güni Halkara parahatçylyk we ynanyşmak ýylynda hem ýokary ruhubelentlige beslendi. Parahatçylygy, dost-doganlygy dabaralandyrýan, dünýäniň ähli halklaryny sagdynlyga, sport bilen meşgullanmaklyga çagyrýan bu senäniň şanyna welaýatymyzda geçirilen çäreler hem ilimiziň agzybirligini, ýurdumyzyň abadançylygyny alamatlandyrdy.

         Halkara baýram mynasybetli Balkanabat şäherindäki «Türkmeniň ak öýi» binasynyň öňündäki meýdançada ýaýbaňlandyrylan aýdym-sazly dabara sagdynlygyň, ruhubelentligiň, sportuň mekany bolan eziz Watanymyza, ajaýyp zamanamyza, ýurdumyzda durmuşa geçirilýän beýik işlere, şol sanda sporty ösdürmeklige, köpçülikleýin bedenterbiýäni, sagdyn durmuş ýörelgesini jemgyýetimizde has-da rowaçlandyrmaklyga gönükdirilen işlere bagtyýar raýatlarymyzyň buýsanjynyň egsilmezdiginiň özboluşly güwäsine öwrüldi. Baýramçylyk keşbine beslenen meýdançada ýaňlanan aýdym-sazlarda, tanslarda hut şol ajaýyplyklaryň waspy belentden ýetirildi. Halkymyzy sagdyn, eşretli, bagtyýar durmuşda ýaşadýan, ýurdumyzyň, türkmen sportunyň şan-şöhratyny dünýäde has-da belende götermekde taýsyz tagallalary edýän Gahryman Arkadagymyza hem-de Arkadagly Gahryman Serdarymyza alkyşdyr hoşallyk sözleriniň şol aýdym-sazlaryň içinden eriş-argaç bolup geçendigini nygtamak aýratyn ýakymlydyr. Bu ýerde türgenleriň ýerine ýetiren görkezme çykyşlarynyň, sportda gazanylan üstünlikleri şöhlelendirýän serginiň hem köpleriň ünsüni özünde jemländigini bellemek gerek.

         Bütindünýä welosiped gününiň esasy çäresi köpçülikleýin welosipedli ýöriş boldy. Edara-kärhanalaryň, guramalaryň wekilleri, talyp ýaşlar, türgenler baýramçylyk güni ir säherden ýörişiň başlanýan ýerine — welaýat merkezindäki «Türkmeniň ak öýi» binasynyň ýanyna ýygnandylar. Hemmeleriň ýüzlerinde şatlyk, kalplarynda buýsanç alamatlary bar. Ine-de, dürli reňkli şarlaryň al-asmana uçurylmagy bilen köpçülikleýin welosipedli ýörişe badalga berilýär. Şäheriň lowurdap duran aýna ýaly tekiz şaýollarydyr köçeleri bilen ýola düşen welosipedçileriň ruhubelentligini, aýdylyşy ýaly, taryp etmäge söz gerek. Diýarymyzda welosiped sportunyň uly meşhurlyga eýe bolandygynyň aýdyň güwäsine öwrülen ýörişiň geçýän ýerlerinde ýaýbaňlandyrylan aýdym-sazly çykyşlar, sport maşklary baýramçylygyň many-mazmunyny has-da baýlaşdyran pursatlary özünde jemledi.

         Bütindünýä welosiped gününe bagyşlanan medeni-sport çäreler, köpçülikleýin welosipedli ýörişler welaýatymyzyň ähli etrap-şäherlerinde ýokary derejede geçirildi.

Dutarçy bagşy-sazandalaryň arasynda Türkmenistanyň Prezidentiniň «Türkmeniň Altyn asyry» atly bäsleşiginiň çäklerinde yglan edilen «Çalsana, bagşy!» bäsleşiginiň welaýatymyz boýunça jemleýji tapgyry geçirildi. Welaýat döwlet drama teatrynda geçirilen bäsleşige bagşylaryň we sazandalaryň 20-si gatnaşdylar. 

Bagşy-sazandalar bäsleşigiň şertlerine laýyklykda, türkmen halk aýdym-sazlaryny, mukamçy kompozitorlaryň döreden eserlerini ýerine ýetirmekde özleriniň zehin-başarnyklaryny görkezip, täze taryhy döwrümizde halypa-şägirtlik ýörelgelerini mynasyp dowam etdirýändiklerini äşgär etdiler. Toý öwüşginli sahna bezeg beren çykyşlar welaýatymyzda milli saz sungatymyzyň ösmegine, gadymy senedimiziň baýlaşmagyna goşant goşýan zehinleriň az däldigine göz ýetirmäge hem mümkinçilik berdi.

Türkmen halkynyň baý geçmiş mirasyny, dutar ýasamak senetçiligini, dutarda ýerine ýetirijilik we bagşyçylyk sungatyny geljekki nesillere ýetirmäge, giňden wagyz etmäge, halypa-şägirtlik ýörelgelerini pugtalandyrmaga, şeýle-de täze ýaş zehinleri ýüze çykarmaga gönükdirilen bäsleşikde bagşylaryň arasynda Balkanabat şäheriniň medeniýet merkeziniň bagşysy Serdar Režim, welaýat ýörite sungat mekdebiniň mugallymy Şamyrat Dawudow, sazandalaryň arasynda welaýat ýörite sungat mekdebiniň talyby Güljemal Ataýewa, harby bölümiň dirižýory Gaýgysyz Geldimämmedow ýeňiji bolup, bäsleşigiň ýurt derejesinde geçiriljek jemleýji tapgyrynda çykyş etmäge hukuk gazandylar. Ýeňijilere hem-de bäsleşikde çykyş eden bagşy-sazandalara gymmatbahaly sowgatlar dabaraly ýagdaýda  gowşuryldy.

Türkmen halkynyň dutarda ýerine ýetirijilik we bagşyçylyk sungatyny geljekki nesillere ýetirmegi, dünýä ýaýmagy, zehinli bagşy-sazandalary ýüze çykarmagy hem-de höweslendirmegi maksat edinen bu bäsleşik welaýatymyzda halypa-şägirtlik ýoluna eýerýän zehinleriň kemala gelýändigini bütin aýdyňlygy bilen aýan etdi.

Welaýat häkimliginiň, welaýat Baş bilim we medeniýet müdirlikleriniň çagalaryň tomusky dynç alyş möwsüminiň başlanmagy mynasybetli  welaýat Taryhy we ülkäni öwreniş muzeýiniň öňündäki meýdançada geçiren dabarasy egsilmez şatlyk-şowhuna beslendi.

            Oňa «Awaza» milli syýahatçylyk zolagyndaky «Balkan», «Daýanç», «Arzuw», Gyzylarbat şäherindäki «Dürdäne», Balkanabat şäheriniň Hazar şäherçesindäki «Gara altyn» çagalar sagaldyş we dynç alyş merkezlerine dynç almaga barýan mekdep okuwçylary ýokary ruhubelentlik bilen gatnaşdylar. Dabarada ýerine ýetirilen aýdym-sazlarda eziz Watanymyzyň, ajaýyp zamanamyzyň, bagtyýar çagalygyň waspy belentden ýaňlandy.            

           Bezemen awtobuslar bilen çagalar sagaldyş we dynç alyş merkezlerine ýola düşüşen bagtyýar ýaş nesiller ýolugra welaýatymyzyň gözel binalary, tebigat täsinlikleri bilen tanyşdylar.    

  Çagalar sagaldyş we dynç alyş merkezlerinde guralan aýdym-sazly dabaralar hem ýatdan çykmajak pursatlara baý boldy. Olarda çagalar aýdym-saz toparlarynyň çykyşlaryna giň orun berildi. Bagtyýar körpeleriň ýerine ýetiren şirin aýdym-sazlarynda, labyzly okan goşgularynda ata Watanymyzyň ajaýyp zamanamyzdaky ösüşleri, Arkadagly Gahryman Serdarymyzyň çagalar barada edýän aladalary aýdyň beýanyny tapdy.

Welaýatymyzda Çagalary goramagyň halkara gününiň çäreleri giň gerime eýe boldy. Esasy baýramçylyk çäreleri Balkanabatdaky «Altynnur», Magtymguly etrap merkezindäki «Arkadagly nesiller», Türkmenbaşy şäherindäki «Salkyn kenar» çagalar medeni dynç alyş merkezlerinde, «Awaza» milli syýahatçylyk zolagyndaky «Älemgoşar» seýilgähinde we «Rowaç» kottežler toplumynda geçirildi. Şatlyk-şowhuna beslenen ýatdan çykmajak  gyzykly çärelere dürli ýaşdaky çagalar höwes bilen gatnaşdylar.

              Şatlykly pursatlarda çagalar barada, halkymyz hakynda ägirt uly aladalar edýän, olaryň sagdyn nesiller bolup ýetişmekleri üçin ajaýyp şert-mümkinçilikleri döredýän hormatly Prezidentimize tüýs ýürekden çykýan alkyş sözleri aýdyldy. Çäreleriň geçirilýän ýerlerinde çagalaryň surat çekmek, gum depejiklerini, balykgulaklardan dürli şekilleri ýasamak, milli oýunlar boýunça bäsleşikleri guraldy.

   Çagalary goramagyň halkara güni mynasybetli welaýat saglygy dikeldiş okuw-terbiýeçilik toplumynda bolan dabara aýratyn şatlyk-şowhuna beslendi. Çagalara hormatly Prezidentimiziň adyndan we Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy tarapyndan ýörite sowgatlaryň gowşurylmagy dabaranyň iň täsirli pursatlaryna öwrüldi.

   Baýramçylyk dabaralaryndan ruhlanan bagtyýar çagalar Gahryman Arkadagymyza, Arkadagly Gahryman Serdarymyza ýürekden çykýan alkyş hem-de hoşallyk sözlerini aýtdylar.

Türkmen halysynyň baýramy mynasybetli welaýat häkimliginiň, Türkmenistanyň Zenanlar birleşmesiniň welaýat bölüminiň, welaýat medeniýet müdirliginiň Balkanabat şäherindäki «Türkmeniň ak öýi» binasynyň öňünde guran aýdym-sazly dabarasy ýatdan çykmajak pursatlara beslendi. Dabarada çykyş edenler türk­men ha­ly­çy­lyk sun­ga­ty­nyň ÝUNESKO-nyň Adamzadyň mad­dy däl me­de­ni mirasynyň sa­nawy­na go­şul­ma­gynyň türk­men halysynyň şöhraty­na şöhrat, şa­ny­na şan goş­andygyny buýsanç bilen bellediler. Ussat halyçylar halyçylyk sungatynyň ösdürilmeginde, zähmet çekmek babatda zerur şertleriň, gadymy nepis sungatyň inçe tärlerini geljekki nesillere ýetirmekde ähli mümkinçilikleriň döredilendigi üçin hormatly Prezidentimize  tüýs ýürekden hoşallyk bildirdiler.

«Arşyň nepisligi — türkmen halysy» diýen at bilen geçirilen baýramçylyk dabarasynda welaýatymyzyň medeniýet we sungat ussatlarynyň, talyp ýaşlaryň ýerine ýetiren döwrebap aýdym-sazlarynda hormatly Prezidentimiziň döwletimiziň berkararlygynyň, halkymyzyň bagtyýarlygynyň hatyrasyna amala aşyrýan dünýä nusgalyk beýik işleri, asyrlaryň jümmüşinden gözbaş alyp gaýdýan türkmen halysynyň şöhraty, ene-mamalarymyzdan miras galan nepis sungaty mynasyp dowam etdirýän halyçy gelin-gyzlarymyzyň waspy belentden ýetirildi.

Dabaraly çärä gatnaşanlar bu ýerde «Türkmenhaly» döwlet birleşiginiň welaýatymyzdaky çeper halyçylyk kärhanalarynyň ussat halyçylarynyň  dokan täze, ajaýyp halylarynyň hem-de haly önümleriniň, Gahryman Arkadagymyzyň «Janly rowaýat», «Arşyň nepisligi» atly kitaplarynyň sergisine höwes bilen syn etdiler. Ümeçi gelin-gyzlar halylary taýýarlamagyň inçe tilsimlerini ussatlyk bilen açyp görkezdiler. Olaryň ýerine ýetiren gazallarydyr läleleri baýramçylyk dabarasyna gatnaşanlara ruhy lezzet paýlady.

Şeýle giň möçberli çäreler Gyzylarbat, Esenguly we Bereket çeper halyçylyk kärhanalarynda hem uludan tutulyp, olarda öňdebaryjy halyçylara gymmatbahaly sowgatlar dabaraly ýagdaýda gowşuryldy.

Türkmen halysynyň baýramy mynasybetli uludan tutulan dabaralarda edilen çykyşlarda ata Watanymyzyň berkararlygy, halkymyzyň bagtyýarlygy, türkmen halysynyň şöhratyny dünýä ýaýmakda amala aşyrýan beýik işleri üçin  Gahryman Arkadagymyza hem-de hormatly Prezidentimize çuňňur hoşallyk sözleri aýdyldy.