Täze ýyl baýramy mynasybetli «Türkmeniň ak öýi» binasynda geçirilen dabara her ýylda bolşy ýaly, Aýazbabadyr Garpamygyň gelmegi bilen başlanyp, şatlyk-şowhuna beslendi. Üsti naz-nygmatly toý saçagynyň başynda jemlenen adamlar birek-biregi Täze ýyl baýramy bilen gutlap, ýagşydan-ýagşy arzuwlar etdiler.

Gahryman Arkadagymyzyň we Arkadagly Gahryman Serdarymyzyň daşynda berkden-berk jebisleşen halkymyz uly ösüşler we özgertmeler bilen hakydamyza ornaşan 2025-nji ýyl bilen hoşlaşyp, täze — 2026-njy ýyly uly ruhubelentlik bilen garşylaýar. Mukaddes Watanymyzyň oňyn başlangyçlara, hoşniýetli dost-doganlyk gatnaşyklaryna esaslanýan ynsanperwer ýörelgeleri dünýä ýüzüne ýaň salýar, il-ýurt bähbitli beýik işleriň netijesinde ähli ulgamlarda uly üstünliklere, belent sepgitlere ýetilýär. Şunuň ýaly köpugurly tutumlar taryha ýazylýan her bir ýylymyzyň şan-şöhrata beslenýändiginden habar berýär. Edilen çykyşlarda şular dogrusynda giňişleýin durlup geçildi. Bagtyýar halkymyzy eşretli durmuşda ýaşadýan Gahryman Arkadagymyzyň hem-de döwlet Baştutanymyzyň janlarynyň sag, ömürleriniň uzak, işleriniň rowaç bolmagy arzuw edildi.

Belentden ýaňlanan şirin owazly aýdym-sazlar, döredijilik toparlarynyň joşgunly tanslary baýramçylyga özboluşly öwüşgin berdi. Ýerine ýetirilen aýdym-sazlarda Gahryman Arkadagymyzyň, hormatly Prezidentimiziň beýik işleriniň, Täze ýylyň, Halkara parahatçylyk we ynanyşmak ýylynda gazanylan üstünlikleriň, ajaýyp döwrümiziň, dost-doganlygyň, agzybirligiň waspy ýetirildi.

Bereket etrabynda «Nurly meýdan» daýhan hojalygynyň gök önümleri ösdürip ýetişdirmek üçin guran döwrebap ýyladyşhanasynyň açylyş dabarasy şatlyk-şowhuna beslendi. Çykyş edenler bu ýere ýygnananlary Halkara parahatçylyk we ynanyşmak ýylynyň rowaç ösüşleri bilen gutlap, halkymyzyň bereketli saçaklarynyň dürli nygmatlara baý bolmagy ugrunda halal zähmet çekmäge döredip berýän giň mümkinçilikleri üçin Gahryman Arkadagymyza hem-de Arkadagly Gahryman Serdarymyza alkyş sözlerini aýtdylar. Medeniýet we sungat  ussatlarynyň ýerine ýetirmeklerinde ýaňlanan aýdym-sazlar, folklor we tans toparlarynyň joşgunly çykyşlary dabara ýygnananlara ruhy lezzet paýlady. Dabaraly açylyşdan soň ýyladyşhananyň içine aýlanyp görenler Garaşsyz, hemişelik  Bitarap Diýarymyzda telekeçilik pudagynyň dünýä derejesine göterilýändigine ýene bir gezek aýdyň göz ýetirdiler.

  Türkmenistanyň Senagatçylar we telekeçiler birleşmesiniň agzasy  «Nurly meýdan» daýhan hojalygynyň  gök önümleri ösdürip ýetişdirmäge niýetlenen döwrebap ýyladyşhanasy Niderlandiýada, Türkiýede, Gresiýada öndürilen enjamlar bilen üpjün edilipdir. Döwrebap tehnologiýalar ýyladyşhananyň ýylylyk, çyglylyk, suwaryş ulgamlarynyň işlerini talabalaýyk ýola goýmakda möhüm ähmiýete eýedir.

     Mälim bolşy ýaly,  «Nurly meýdan» daýhan hojalygy ýurdumyzda telekeçiligi ösdürmek babatda amala aşyrylýan giň mümkinçiliklerden ýerlikli peýdalanyp, ýokary önümçilik görkezijilerini gazanýan hususy kärhanalaryň biridir. Hormatly Prezidentimiziň ýurdumyzda telekeçiligi ösdürmäge berýän üns-aladalaryndan ruhlanýan daýhan hojalygynda öndürilýän önümleriň özüne düşýän gymmatyny arzanlatmaga, ýerden, suwdan rejeli peýdalanmaga niýetlenen kämil tehnologiýalar yzygiderli ornaşdyrylýar.

Gök önümleriň dürli görnüşlerini ösdürip ýetişdirmäge niýetlenen, ekerançylyk meýdany 10 gektara, umumy tutýan meýdany bolsa 13,6 gektara barabar bolan ýyladyşhana birbada täze iş orunlarynyň 150-den gowragyny

döretmäge mümkinçilik berdi. Bu ýerde agrotehniki talaplara laýyk ýetişýän pomidorlary ýygnamak işi geljek ýylyň tomus aýyna çenli dowam eder. Ýyladyşhanada ýygnalýan pomidor hasylynyň içerki bazarlardan artan bölegini daşarky bazarlara satuwa  ugratmak göz öňünde tutulýar. 

Welaýatymyzda Täze ýyl baýramçylygynyň esasy çäreleriniň biri bolan Baş arçanyň yşyklarynyň ýakylyş dabarasy ýokary ruhubelentlige beslendi. Gojaman Hazar deňziniň mawy tolkunlaryny, gözel dag tebigatyny synlap gelen Aýazbabadyr Garpamyk  nurana ertirlerimiziň eýeleri bolan körpeler bilen  sebitdäki kaşaň we täsin binalara gezelenç etdiler, täze ulanmaga berlen desgalardyr  önümçilik binalary bilen tanyşdylar.

            Täze ýyl dabarasynyň hormatly myhmanlary dünýä jahankeşdeliginiň merjeni hasaplanýan «Awaza» milli syýahatçylyk zolagyndaky sagaldyş we dynç alyş merkezlerini synladylar. Olar aýdym-sazlara beslenen dabaralarda kalplary buýsançdan doly körpelere öz ýurdumyzda öndürilýän dürli süýjüliklerden  taýýarlanyp, ýaraşykly gaplara gaplanan Täze ýyl sowgatlaryny gowşurdylar. Azaýbabadyr Garpamyk Türkmenbaşynyň Halkara deňiz portuna we Garabogazköl aýlagynyň üstünden geçýän awtomobil köprüsine baryp gördüler. Arzyly myhmanlar soňra nebitiň we gazyň baý gorlary jemlenen Uzynada  baýlyklar känine  tarap ýola düşdüler.

         Aýazbaba bilen Garpamygyň Balkanabat şäherine gelmegi, welaýat kitaphanasyna  baryp, bu ýerde Gahryman Arkadagymyzyň hem-de Arkadagly Gahryman Serdarymyzyň jöwher zehinlerinden dörän kitaplary okap görmegi hem çuňňur many-mazmuna eýe boldy. Olaryň welaýat saglygy dikeldiş okuw-terbiýeçilik toplumynda bolup, körpelere Täze ýyl sowgatlaryny paýlamagy aýratyn ýatda galyjy pursatlara baý boldy.

Täze ýyl arçasynyň yşyklarynyň ýakylyş dabarasy köpçülikleýin toý ýörişi bilen başlanyp, buýsançly çäreleriň üstüni ýetirdi. Toý ýörişiniň dowamynda asuda, abadan döwrümizi peşgeş beren,  okamaga we döwrebap bilim almaga giň mümkinçilikleri döreden Gahryman Arkadagymyzyň hem-de Arkadagly Gahryman Serdarymyzyň adyna aýdylan alkyş sözler belentden ýaňlandy. 

«Türkmeniň ak öýi» binasynyň öňünde oturdylan welaýatymyzyň Täze ýyl Baş arçasynyň yşyklarynyň ýakylyş dabarasy uly şatlyk-şowhuna, egsilmez joşguna beslendi. Aýazbaba bilen Garpamyk körpeleriň haýyşy bilen welaýatymyzyň Baş arçasynyň yşyklaryny ýakdylar. Dürli öwüşginlerde şugla saçýan yşyklar Täze ýyl arçasynyň bezegini öňküdenem artdyryp, bu ýeriň gözelligine gözellik goşdy.

Nebitgaz  senagaty we geologiýa işgärleriniň güni mynasybetli Balkanabat şäherindäki Nebitçileriň medeniýet köşgünde dabaraly maslahat geçirildi. «Halkara parahatçylyk we ynanyşmak ýylynda nebitgaz pudagynda ýetilen sepgitler» diýen at bilen geçirilen maslahata ýurdumyzyň nebitgaz toplumynyň edara-kärhanalaryndan, «Türkmennebit» döwlet konserniniň önümçilik   düzümlerinden, geologiýa pudagyndan jogapkär adamlar, önümçiligiň öňdebaryjylary, jemgyýetçilik guramalarynyň we ýaşuly nesliň wekilleri,  talyp ýaşlar  gatnaşdylar.  

           Dabaraly maslahat hormatly Prezidentimiziň Garaşsyz, hemişelik Bitarap Türkmenistanyň nebitgaz senagaty we geologiýa işgärlerine iberen baýramçylyk Gutlagynyň okalmagy bilen başlandy. Arkadagly Gahryman Serdarymyzyň baýramçylyk gutlagyndan ruhlanan nebitçilerdir gazçylar, geologlar hem bu çärede çykyş edip, hormatly Prezidentimiziň parasatly baştutanlygynda milli ykdysadyýetimiziň binýatlyk sütünleriniň biri bolan nebitgaz ulgamynda we geologiýa pudagynda ýetilen belent sepgitler, gazanylan ösüşler, ägirt uly özgertmeler dogrusynda  buýsançly gürrüň etdiler. 

         Maslahatyň dowamynda göreldeli zähmet çekýän nebitçilere, gazçylara we geologlara hormatly Prezidentimiziň adyndan gymmatbahaly baýramçylyk sowgatlary gowşuryldy.  Nebitçileriň medeniýet köşgüniň sungat ussatlarynyň ýerine  ýetirmeklerinde ýaňlanan döwrebap aýdym-sazlar dabaraly çärä aýratyn ruhubelentlik nuruny çaýdy. Ol aýdymlarda Gahryman Arkadagymyzyň hem-de Arkadagly Gahryman Serdarymyzyň alyp barýan tutumly işleriniň, Berkarar döwletiň täze eýýamynyň Galkynyşy döwrüniň, erkana hem eşretli  ýaşaýşymyzyň  waspy  belentden ýaňlandy.

Welaýatymyzda Halkara Bitaraplyk gününiň, hemişelik Bitaraplygymyzyň şanly 30 ýyllygy mynasybetli dabaraly çäreler ýokary ruhubelentlige beslendi. Baýramçylygyň esasy çäreleri Balkanabat şäherindäki Baş baýdak meýdançasynda ir säherden başlandy. Welaýat häkimliginiň welaýat medeniýet müdirligi bilen bilelikde guramagynda geçirilen dabarada Döwlet senamyzyň belentden ýaňlanmagy bilen, ýaşyl Tugumyz al-asmana göterildi. Çykyş edenler bu ýere ýygnananlary hemişelik Bitaraplygymyzyň 30 ýyllyk baýramy bilen tüýs ýürekden gutlap, baky Bitaraplygymyzyň many-mazmuny, ähmiýeti, hormatly Prezidentimiziň alyp barýan daşary syýasaty, halkara gatnaşyklary ösdürmekde durmuşa geçirilýän beýik işler dogrusynda gürrüň etdiler. Gahryman Arkadagymyzyň, Arkadagly Gahryman Serdarymyzyň adyna aýdylan alkyş sözleri dowamly el çarpyşmalar bilen garşylandy.

Baýramçylyk çäresiniň dowamy welaýatyň medeniýet we sungat ussatlarynyň ruhubelentlik bilen ýerine ýetiren aýdym-sazlary, folklor, tans toparlarynyň çykyşlary bilen utgaşdy. Halkara parahatçylyk we ynanyşmak ýylynyň, il agzybirliginiň, ýurt asudalygynyň waspyny ýetiren täsirli çykyşlar  baýramçylygy dürli derejeli toý çäreleri bilen garşylaýan halkymyzyň baky Bitaraplygymyza bolan egsilmez buýsanç duýgularynyň özboluşly beýanyna öwrüldi. Soňra dabara «Türkmeniň ak öýi» binasynda «Halkara parahatçylyk we ynanyşmak ýylynda baky Bitarap toýuň gutly bolsun, jan Watan!» ady bilen geçirilen aýdym-sazly çäre bilen dowam etdi. Onda halypa aýdymçylaryň, «Ýaňlan, Diýarym!» telebäsleşiginiň ýeňijileriniň, welaýat ýörite sungat mekdebiniň talyplarynyň, tans we folklor toparlarynyň şowhunly çykyşlary sungat muşdaklary üçin özboluşly baýramçylyk sowgady boldy. Belentden ýaňlanan aýdym-sazlarda Gahryman Arkadagymyzyň we Arkadagly Gahryman Serdarymyzyň beýik işleriniň, ajaýyp döwrümiziň, baky Bitaraplygymyzyň waspy ýetirildi. Welaýat döwlet drama teatrynyň artistleri edebi-sazly kompozisiýa bilen çykyş etdiler. Daşary ýurt aýdymlarynyň ýerine ýetirilmegi çäräniň şatlyk-şowhunyny artdyrdy.

Baýramçylyk konsertine gatnaşan sungat wekilleriniň ýerine ýetirmeklerinde joşgunly ýaňlanan «Bitarap eziz Watan» diýen aýdym halkymyzyň Gahryman Arkadagymyza, hormatly Prezidentimize hem-de ýurt berkararlygyna bolan beýik söýgüsini aýdyň görkezdi