“Halkyň Arkadagly zamanasy” ýylynyň galla hasylyny öz wagtynda ýygnap almakda gyzgalaňly dowam edýän joşgunly zähmete awtoulag sürüjileri hem mynasyp goşantlaryny goşýarlar. Öndürijilikli zähmeti bilen tapawutlanýan şeýle sürüjileriň birem “Balkanawtoulag” önümçilik birleşiginiň sürüjisi Rejepmämmet Babaýewdir. Ol özüniň erk edýän “KamAZ” kysymly awtoulagy bilen jogapkärli möwsümiň ilkinji günlerinden joşgunly zähmetiň jümmüşinde.

         — Men 2007-nji ýyldan bäri galla oragyna gatnaşyp, daýhanlarymyzyň ýetişdiren ak bugdaýynyň isripsiz ýygnalyp, Watan harmanyna tabşyrylmagyna goşandymy goşup gelýärin. Özüm Bereket etrabynda doglup, şol ýerde hem önüp-ösdüm. Şonuň üçin ekerançylyk — meniň üçin tanyş iş. Ýetişdirilen hasyl — tutuş halkyň rysgaly. Ony ýygnamak işi örän jogapkärli, muňa oňat düşünýäris. Her günde awtoulagym bilen 30-40 tonna töweregi bugdaý hasylyny kabul ediş nokatlaryna daşamagyň hötdesinden gelýärin — diýip, Rejepmämmet gürrüň berýär. 

Serdar etrabynyň ekin meýdanlaryndan ýygnalýan bugdaý hasylyny galla kabul edýän nokatlara daşamakda «Balkanawtoulag» önümçilik birleşiginiň sürüjisi Baýram Baýramdurdyýew hem göreldeli zähmet çekýär.

— Ak bugdaýyň egsilmeýän berekedi — halkymyzyň tutuş ýylyň dowamynda iýjek çöregi. Çörek bolsa halkymyz üçin iň mukaddes zatlaryň biridir. Şonuň üçin hem galla oragyna gatnaşmagy özümize bildirilýän uly ynam hasap edýäris. Şol ynamy ödemek abraý-hormatyňy beýgeldýär. Indi on ýedi ýyl bäri galla oragyna gatnaşyp gelýärin. Ak bugdaý harmanlarynyň gözümiziň alnynda beýgelip barýandygy göwnümizi göterýär. Şonuň üçin hem biz işde hiç hili argynlyk duýamzok. Öndürijilikli işlemekde döredilýän şert-mümkinçilikler üçin hormatly Prezidentimize sag bolsun aýdýarys — diýip, «KamAZ» kysymly ýük awtoulagy bilen mydama hyzmata taýyn sürüji gürrüň berýär. Az wagtlyk gürrüňimiz paýawlandessine sürüji ulagyny işledip, bugdaý hasylyny ýygnaýan kombaýnlara tarap ugrady.

 12-nji iýunda ýurdumyzda giňden bellenip geçilen Ylymlar güni mynasybetli «Türkmennebit» döwlet konserniniň Balkanabat nebitçilik orta hünär okuw mekdebinde  «Ylym — mynasyp durmuşyň kepili» ady bilen dabaraly ylmy-amaly maslahat geçirildi. Onda çykyş  edenler ýurdumyzyň ylym-bilim ulgamynda gazanylan üstünlikler, ýetilen belent sepgitler dogrusynda gürrüň etdiler. Ajaýyp döwrümizde ylym-bilim işgärleriniň işlemegi, zehinli ýaşlaryň ukyp-başarnyklaryny açyp görkezmegi üçin ähli şert-mümkinçilikleriň döredilendigini buýsançly bellediler. Özleri barada uly alada edýän hormatly Prezidentimize alkyş aýtdylar. Soňra talyp ýaşlaryň ýerine ýetirmeklerinde aýdym-sazly çykyşlara uly orun berildi. 

Ylmy-amaly maslahatyň dowamynda «Türkmennebit» döwlet konserniniň «Nebitgazylmytaslama» institutynyň işgärlerine, Balkanabat nebitçilik orta hünär okuw mekdebiniň göreldeli mugallymlarynadyr talyplaryna diplomlar hem-de sowgatlar gowşuryldy.

Welaýatymyzda galla oragy möwsüminiň başlanmagy mynasybetli welaýat häkimliginde dabaraly maslahat geçirilip, onda galla oragyny ýokary derejede geçirmek üçin görlen taýýarlyk, möwsümiň dowamynda bökdençsiz işlediljek kombaýnlaryň iş düzgünleri, ýygnalan hasyly isrip etmän saklamagyň kadalary, howpsuzlyk düzgünlerini berk berjaý etmek dogrusynda giňişleýin gürrüň edildi. Oba hojalygynda uly özgertmeleri durmuşa geçirýän Arkadagly Serdarymyzyň adyna alkyş sözleri aýdyldy. Maslahatdan soňra galla oragyna gatnaşjak mehanizatorlar welaýat Taryhy we ülkäni öwreniş muzeýine baryp, bu ýerde ýerleşdirilen muzeý gymmatlyklary, halkymyzyň gadymy ekerançylyk däpleriniň beýany bolup durýan taryhy-medeni gymmatlyklar bilen tanyşdylar hem-de olar baradaky täsin gürrüňleri diňlediler. Galla oragy möwsüminiň başlanmagy mynasybetli Serdar etrabynyň «Paraw» daýhan birleşiginiň ekerançylyk meýdanynda guralan dabara has-da ýatda galyjy boldy. Bu ýerde medeni çärelere giň orun berlip, oba hojalyk önümleriniň sergisi guraldy, şirin aýdym-sazlaryň hoş owazy alyslara ýaň saldy. Soňra dilleri senaly ýaşulularyň «Bismilla!» diýip başlap bermegi bilen galla oragyna girişildi. Şu ýyl welaýatymyzyň gallaçylary bugdaý ekilen 50 müň gektar meýdandan 80 müň tonna däne hasylyny ýygnamagy maksat edinýärler. Bu sepgide ýetmek üçin möwsümiň dowamynda kuwwatly kombaýnlaryň 156-sy, awtoulaglaryň 780-si bökdençsiz işlediler. Düzüminde degişli hünärmenler bolan tehniki hyzmat ediş toparlarynyň bolsa 26-sy galla oragyna gatnaşýan tehnikalara hyzmat ederler. Ak bugdaýly awtoulag kerweniniň Serdar etrabyndaky galla kabul ediş kärhanasynda garşylanyş dabarasy hem özboluşly baýramçylyga öwrüldi. Medeniýet we sungat ussatlarynyň gallaçylarymyzyň zähmet üstünliklerini, saçaklaryň rysgal-berekedi bolan ak bugdaýy, bagtyýar durmuşymyzy, «Halkyň Arkadagly zamanasy» ýylynyň taryhy tutumlaryny taryplaýan şirin aýdym-sazlary, milli tanslary dabara özboluşly bezeg berdi. Şunuň ýaly şatlyk-şowhunyň astynda galla kabul ediş kärhanasynda ak bugdaýyň ilkinji tonnalary düşürildi. 

Balkanabat şäherindäki «Türkmeniň ak öýi» binasynyň ajaýyp sahnasynda ýurdumyzyň meşhur estrada aýdymçylarynyň hem-de wäşileriniň täsirli çykyşlary welaýat merkeziniň bagtyýar ýaşaýjylaryna ruhy lezzet paýlady. Türkmenistanyň halk artistleri Suhan Orazberdiýewiň, Dilber Rahmanowanyň, Züleýha Kakaýewanyň, Türkmenistanyň at gazanan artisti Aly Alyýewiň, şeýle-de ýurdumyzda giňden tanalýan Durdy Durdyýewiň, Mähri Pirgulyýewanyň, Bilbil Ahmedowanyň ajaýyp aýdymlary, Täçmämmet Annagulyýewiň, Rahat Baýramowyň degişme sahnalary tomaşaçylarda ýakymly täsirler galdyrdy. Üç günläp dowam eden çykyşlarda medeniýet we sungat ussatlary Berkarar döwletiň täze eýýamynyň Galkynyşy döwründe hormatly Prezidentimiziň Garaşsyz, hemişelik Bitarap Diýarymyzyň dürli ugurlarda ýeten belent sepgitlerini täze belentliklere götermekde üstünlikli durmuşa geçirýän taryhy tutumlaryny, bagtyýar durmuşymyza bolan synmaz söýgini, mukaddes Watanymyzy tarypladylar.