Tomus — çagalar üçin gyzykly we şadyýan döwür. Şonuň üçin olar bu pasla sabyrsyzlyk bilen garaşýarlar. Ine, hemmeler üçin şol arzyly günler ýetip geldi, dynç alyş günleri başlandy.

Balkan welaýat Taryhy we ülkäni öwreniş muzeýiniň öňündäki meýdançada bagtyýar körpeler «Awaza» milli syýahatçylyk zolagyndaky «Balkan», «Hazar şäherindäki «Gara Altyn», Serdar şäherindäki «Dürdäne» çagalar sagaldyş we dynç alyş merkezine ugratmaga bagyşlanyp dabara geçirildi. Welaýat hem-de şäher häkimlikleriniň, welaýat Baş bilim, medeniýet müdirlikleriniň, Türkmenistanyň Magtymguly adyndaky Ýaşlar guramasynyň welaýat, şäher geňeşleriniň bilelikde guramaklarynda geçirilen dabara şatlyk-şowhuna beslenip, onda zehinli çagalaryň ýerine ýetiren aýdym-sazlary bu ýere ýygnananlara ruhy lezzet paýlady.

Bagtyýar çagalar reňkli şarlar bilen birkemsiz bezelen awtobusda sagaldyş we dynç alyş merkezlerine tarap ýola düşdüler. Ol ýerlerde aýdym-sazyň owazy belentden ýaňlanyp, çagalar dabaraly ýagdaýda garşy alyndy.

Merkezler ýaş nesliň gowy dynç almagy üçin birkemsiz taýýarlanylypdyr. Çagalaryň wagtlaryny gyzykly we şadyýan geçirmekleri üçin ýörite meýilnama düzülipdir. Ähli amatlyklary bolan giň hem-de ýagty otaglarda ýaş nesliň kitap okamagy, sport bilen meşgullanmagy üçin ähli şertler döredilipdir. Aýdym-saz, kompýuter we beýleki otaglary çagalaryň hyzmatynda. Merkezlerde zehinli çagalaryň arasynda sungatyň dürli ugurlary hem-de sportuň görnüşleri boýunça  bäsleşikleri guramak, duşuşyklary geçirmek, gözel ýerlere gezelençleri guramak göz öňünde tutulýar. Döwrümiziň gül-gunçalaryna, Watanymyzyň daýanjyna deňelýän şadyýan nesillerimiz özleri üçin ähli mümkinçilikleri döredip berýän hormatly Prezidentimize alkyş aýdýarlar.

Çagalary goramagyň halkara gününe bagyşlanan dabaraly çäre welaýat kitaphanasynyň öňündäki meýdançada welaýat hem-de Balkanabat şäher häkimlikleriniň, welaýat Baş bilim müdirliginiň, Türkmenistanyň Magtymguly adyndaky Ýaşlar guramasynyň welaýat, şäher geňeşleriniň bilelikde guramaklarynda geçirildi. Mekdebe çenli çagalar edaralarynda terbiýelenýän körpeleriň, başlangyç synp okuwçylarynyň ýerine ýetiren joşgunly aýdym-sazlary bu ýere ýygnananlaryň göwünlerini galkyndyrdy. Çagalar tans toparlarynyň ýerine ýetiren kompozisiýalary şowhunly el çarpyşmalar bilen garşylandy. Welaýat çagalar sungat mekdebiniň skripkaçylar we fleýtaçylar toparlarynyň çalyp beren ajaýyp sazlary has-da täsirli boldy.

Çagalar welaýat Taryhy we ülkäni öwreniş muzeýinde hem-de welaýat kitaphanasynda gezelençde boldular. Olar milli gymmatlyklarymyz, taryhy tapyndylarymyz hem-de däp-dessurlarymyz barada gyzykly gürrüňleri diňlediler.

Baýramçylyga bagyşlanan dabara Balkanabat şäheriniň gözel künjekleriniň birinde ýerleşýän «Altyn nur» dynç alyş merkezinde dowam etdi. Ol ýerde bagtdan paýly körpelerimiz türkmen milli oýunlarynda, aýdym aýtmakda, goşgy okamakda ukyp-başarnyklaryny görkezdiler. Gahryman Arkadagymyzyň halkymyza sowgat beren «Ömrümiň manysy» atly kitabyndan parçalary okadylar.

Soňra çagalar ertekiler dünýäsini ýadyňa salýan dynç alyş merkezinde gezelenç etdiler. Awtoulag meýdançasynda bolup, gämi şekilli hiňňildik uçdular. Multfilmleriň gahrymanlary bilen tanyşdylar. Ýüzleri şatlykdan, kalplary buýsançdan doly körpeler ýatdan çykmajak çärelere beslenen Çagalary goramagyň halkara gününde özleri barada alada edýän hormatly Prezidentimize alkyş aýdyp, Arkadagly Serdarymyzyň janynyň sag, ömrüniň uzak bolmagyny arzuw etdiler.

 Balkanabat şäherindäki 22-nji çagalar bagynyň welaýat Baş bilim müdirligi bilen bilelikde Çagalary goramagyň halkara güni mynasybetli mekdebe çenli çagalar edaralarynda terbiýelenýän körpeleriň arasynda guran ýaryşy gyzykly häsiýete eýe boldy. Bütindünýä welosiped gününiň öň ýanynda çagalaryň welosiped sürmekde öz ukyp-başarnyklaryny görkezmekleri toýlary toýlara ulaşýan ýurdumyzda sagdyn durmuş ýörelgesiniň barha rowaçlyklara beslenýändiginiň güwäsine öwrüldi. «Kim çalasyn, kim çakgan?» atly bäsleşikde bolsa körpeler sportuň dürli görnüşleri boýunça güýç synanyşdylar. Ýaryşlara gatnaşan çagalaryň hemmesine welaýat Baş bilim müdirligi tarapyndan sowgatlar gowşuryldy.

Berkarar döwletiň täze eýýamynyň Galkynyşy döwrüniň «Halkyň Arkadagly zamanasy» ýylynda halyçy gelin-gyzlara goýulýan hormat-sarpanyň belentdiginiň nobatdaky subutnamasy bolup dabaralanan Türkmen halysynyň baýramy mynasybetli Balkanabat şäherindäki «Türkmeniň ak öýi» binasynyň öňündäki giň meýdançada geçirilen aýdym-sazly toý çäresi şatlyk-şowhuna beslendi. Dabara il sylagly ýaşulular, mährem eneler, halyçy gelin-gyzlar, önümçilik kärhanalarynyň, bilim, medeniýet, sport ulgamlarynyň işgärleri, ýaşlar gatnaşdylar.

Baýramçylyk dabarasynyň geçirilýän ýeri birkemsiz bezeldi. Haly we haly önümleriniň, el işleriniň, milli şaý-seplerimiziň, muzeý gymmatlyklarynyň sergisi dabara özboluşly öwüşgin çaýdy.

Çäräniň dowamynda edilen çykyşlarda halkymyzyň asyrlar aşyp gelýän halyçylyk sungatyny ösdürmekde, haly gölleriniň gadymy nusgalaryna täze öwüşgin çaýmakda asylly zähmet çekýän zenanlara hormatly Prezidentimiz tarapyndan uly hormat-sarpa goýulýandygy buýsanç bilen nygtaldy. Halyçy zenanlaryň mähir-yhlasyndan dörän haly sungatynyň barha kämilleşmegine, şan-şöhratynyň älem-jahana ýaýylmagyna ak ýollary açýan hormatly Prezidentimize tüýs ýürekden alkyş aýdyldy. Arkadagly Serdarymyzyň janynyň sag, ömrüniň uzak bolmagy, alyp barýan işleriniň barha rowaçlanmagy arzuw edildi.

Baýramçylyk dabarasynda sungat ussatlarynyň we ýaş çeper höwesjeňleriň ýerine ýetiren aýdym-sazlarynda, tanslarynda, küştdepdidir gazallarynda zenan zehininden döreýän nepis halylar, abraýy arşa galýan ata Watanymyz, halkymyzyň bagtyýarlygy ugrunda taýsyz tagallalary edýän Arkadagly Serdarymyzyň alyp barýan beýik işleri wasp edildi. Türkmen halysynyň baýramy mynasybetli dabaraly çäreler welaýatymyzyň ähli etrap-şäherlerinde hem şatlyk-şowhuna beslendi.

Bereket etrabynda ýerleşýän «Nurly meýdan» daýhan hojalygy öndürýän azyk önümleriniň möçberlerini hem-de görnüşlerini artdyrmakda döredijilikli işleýän hususy kärhanalaryň biridir. Daýhan hojalygy Berkarar döwletiň täze eýýamynyň Galkynyşy döwrüniň ýokary talaplaryndan ugur alyp, oba hojalyk pudagynda alnyp barylýan özgertmelere işjeň goşulyşýar. Munuň özi daýhan hojalygyna ekerançylyk meýdanlaryny özleşdirmekde, maldarçylygy, aýratyn-da guşçulygy ösdürmekde guwandyryjy netijeleri gazanmaga mümkinçilik berýär. Häzirki wagtda hojalygyň ekin meýdanynyň umumy möçberi 393 gektara ýetip, şonuň agramly bölegine ot-iýmlik ekinler ekilýär.

Daýhan hojalygy ýyllyk kuwwaty 8 müň tonna barabar bolan towuk etini öndürýän bölümi, 12 million jüýje çykarmaga niýetlenen inkubatorly guşçulyk toplumyny, 16 million ýumurtga öndürmäge ýöriteleşdirilen toplumy, 100 tonna et öndürmäge mümkinçilik berýän maldarçylyk toplumyny özünde jemleýär. Bu ýerde idedilýän guşlar üçin ýokumly iýmleri öndürýän, ýyllyk kuwwaty 70 müň tonna bolan zawodyň hereket etmegi öndürilýän önümleriň bahasynyň elýeterliliginde wajyp ähmiýetlidir. Şeýle hem hojalygyň ýylda 500 müň sany bägül ösdürip ýetişdirýän ýyladyşhanasy bar.

«Nurly meýdan» daýhan hojalygy boýunça ýylyň başyndan bäri 681 tonnadan gowrak towuk eti öndürilip, sarp edijilere ugradyldy. Bu döwürde öndürilen ýumurtganyň umumy sany 2 million 716 müňden geçdi. Çykarylan jüýjeleriň sany 1 million 152 müňe barabar bolup, guşlar üçin niýetlenen ýokumly iýmleriň 2 müň 379 tonnadan gowragy öndürildi.