Welaýat merkezindäki Baş baýdak meýdançasy ýurdumyzda Aşgabat şäheriniň gününiň bellenilýän hem-de «Soňky jaň» dabarasynyň geçirilýän gününde toý lybasyna beslendi. Welaýatymyzyň umumybilim berýän orta mekdepleriniň iň göreldeli uçurymlary hem-de öňdebaryjy bilim işgärleriniň köp sanlysy baýramçylyk ýörişi bilen bu ýere gelip, al-asmanda parlaýan ýaşyl Tugumyzyň belent sütüniniň öňünde gül goýmak dabarasyna gatnaşdylar. 

Soňra esasy dabara welaýat merkezindäki iňlis dili dersine ýöriteleşdirilen 25-nji orta mekdepde uly joşgun, şatlyk-şowhun bilen dowam etdi. Dabarada çykyş edenler bu ýere ýygnananlary Halkara parahatçylyk we ynanyşmak ýylynyň ýokary ruhubelentliginde toýlanýan «Soňky jaň» dabarasy hem-de Aşgabat şäheriniň güni bilen tüýs ýürekden gutladylar. Milletler bileleşigi tarapyndan üç gezek ykrar edilen hemişelik Bitaraplygymyzyň 30 ýyllygynyň giňden bellenilip geçilýän ýylynyň bagtyýar uçurymlaryna bolsa uly durmuşyň  ak ýollarynda üstünlikleri arzuw etdiler. Ýurdumyzyň bilim ulgamyny hil taýdan dünýä ülňülerine laýyk getirmekde, bilimli, ylymly, giň dünýägaraýyşly, sanly tehnologiýalardan kämil derejede baş çykarýan, Watanymyza, halkymyza wepaly, sagdyn nesilleri terbiýeläp ýetişdirmekde ýetilen sepgitler hem-de üstünlikli dowam etdirilýän özgertmeler dogrusynda buýsanç bilen nygtadylar. Şeýle döwletli işleriň sakasynda durýan türkmen halkynyň Milli Lideri Gahryman Arkadagymyza hem-de Arkadagly Gahryman Serdarymyza ýürekden çykýan hoşallyklaryny beýan etdiler. Döwlet derejesinde edilýän şeýle aladalara bilimlerini artdyrmak, ylym öwrenmek, hünär edinmek, gurmak, döretmek, tutanýerli zähmet çekmek, elmydama kämillige ymtylmak arkaly mynasyp jogap bermegiň täze durmuşa gadam basýan uçurymlaryň belent borjy, esasy maksady bolmalydygyna ünsi çekdiler. Uçurymlar bolsa munuň üçin ähli yhlas-başarnyklaryny orta goýjakdyklaryny ynandyrdylar.

Şeýle çuň mazmunly çykyşlardan soňra 2024 — 2025-nji okuw ýylynyň tamamlanýandygyny alamatlandyrýan soňky jaňyň sesi ýaňlandy. Şol pursat ak arzuwlaryň, parahatçylygyň nyşany bolup durýan ak kepderilerdir dürli reňkli howa şarlary asuda asmany bezedi. Dabarada mekdep okuwçylarynyň joşgun bilen ýerine ýetiren şirin aýdym-sazlarynda mekdep durmuşy, täze taryhy eýýamyň beýik tutumlary, Aşgabat şäheriniň gözellikleri, baky Bitaraplygymyz, bagtyýar durmuşymyz wasp edildi. Şeýle hem dabaranyň dowamynda zehin-ukyby, bilime, ylma höwesi bilen aýratyn tapawutlanan uçurymlaryň birnäçesine Hormat hatlary hem-de ýadygärlik sowgatlar şowhunly el çarpyşmalaryň astynda gowşuryldy.

«Soňky jaň» dabarasy mynasybetli «Awaza» milli syýahatçylyk zolagyna, welaýat Taryhy we ülkäni öwreniş muzeýine, welaýat kitaphanasyna guralan gezelençler uçurymlarda ýatdan çykmajak ýakymly täsirleri galdyrdy. Welaýat kitaphanasynyň öňündäki gözel meýdançada agşamara guralan aýdym-sazly dabara hem uçurymlar üçin şeýle ýakymly pursatlaryň üstüni ýetirdi. Onda medeniýet we sungat ussatlary bilen birlikde, sungata höwesli uçurymlar ýerine ýetiren joşgunly aýdym-sazlary arkaly Gahryman Arkadagymyzyň hem-de Arkadagly Gahryman Serdarymyzyň beýik tutumlaryna, eşretli zamanamyza bolan ýürek buýsançlaryny beýan etdiler.