Garaşsyzly­gy­my­zyň şanly 34 ýyl­lygy mynasybetli dabaralaryň biri-birine ulaşýan günlerinde welaýat, etrap, şäher häkimlikleriň ýolbaşçylar düzümi üçin hormatly Prezidentimiziň sowgady bolan täze ýeňil gulluk awtoulaglarynyň welaýatymyza gelip gowuşmagy şatlyk-şowhunly çäreleriň hataryny artdyrdy. Bu waka mynasybetli welaýat merkezindäki «Türkmeniň ak öýi» binasynyň ýanynda geçirilen dabaraly çäre oňa gatnaşýanlarda ýatdan çykmajak duýgulary döretdi.

          Çärä welaýat, etrap, şäher häkimlikleriniň ýolbaşçylary, Türkmenistanyň Mejlisiniň deputatlary, jemgyýetçilik guramalarynyň wekilleri, il sylagly ýaşulular, kümüş saçly mährem eneler gatnaşdylar. Bu ýerde täze awtoulaglar türkmen halkynyň milli däplerine laýyklykda, ak un sepilip, üzärlik tütedilip, aýdym-sazyň belent owazy astynda garşy alyndy. 

          Täze gulluk awtoulaglarynyň gelip gowuşmagy welaýatda alnyp barylýan işlere, öňde durýan wezipelere hötde gelmeklige özboluşly ýardam eder. Bular barada dabaraly çärede buýsanç bilen gürrüň edildi.

          Bu ýerde welaýatyň medeniýet we sungat ussatlarynyň çykyşlary giňden  ýaýbaňlandyryldy. Aýdym-sazly çykyşlarda Gahryman Arkadagymyzyň hem-de Arkadagly Gahryman Serdarymyzyň amala aşyrýan beýik işleriniň, Garaşsyzlygymyzyň 34 ýyllyk, hemişelik Bitaraplygymyzyň 30 ýyllyk baýramlarynyň waspy belentden ýetirildi. Ýurdumyzy ösüşleriň täze belentliklerine tarap ynamly alyp barýan  Gahryman Arkadagymyza hem-de Arkadagly Gahryman Serdarymyza   tüýs ýürekden çykýan hoşallyk sözleri çykyşlaryň içinden eriş-argaç bolup geçdi.