Welaýat merkezindäki Baş baýdak meýdançasynda geçirilen «Arkadagly Gahryman Serdarymyz, Siziň bilen dünýä dolýar şanymyz!» atly aýdym-sazly dabara şatlyk-şowhuna, uly ruhubelentlige beslendi. Oňa welaýat we şäher häkimlikleriniň, jemgyýetçilik guramalarynyň wekilleri, dürli ulgamlarda zähmet çekýän işgärler, il sylagly ýaşulular, kümüş saçly eneler, talyp ýaşlar hem-de bagtyýar körpeler gatnaşdylar.

Dabarada welaýatyň sungat ussatlarynyň çykyşlaryna uly orun berlip, hormatly Prezidentimiziň parasatly baştutanlygynda döwlet we jemgyýetçilik durmuşynda bolup geçen ägirt uly özgerişleriň, dürli ugurlarda ýetilen belent sepgitleriň tarypy ýetirildi. Bu günki gün döwlet Baştutanymyzyň güneşli Diýarymyzyň asudalygyny, abadançylygyny, durmuş-ykdysady taýdan ösüşini üpjün etmek, halkymyzyň ýaşaýyş-durmuş derejesini has-da gowulandyrmak we bütin dünýäde parahatçylyk söýüjilik, ynanyşmak ýörelgelerini berkitmek ýaly asylly maksatlarynyň rowaçlyga beslenýändigi buýsançly hem şowhunly çykyşlarda öz beýanyny tapdy. Ata Watanymyzyň dünýäniň ösen döwletleriniň hatarynda ebedilik orun almagy, halkymyzyň asuda, parahat, bagtyýar durmuşda ýaşamagy ugrunda taýsyz tagallalary edip, gysga döwrüň içinde beýik işleri durmuşa geçiren hormatly Prezidentimize hoşallyklar aýdymçylaryň, tans toparlarynyň, teatr artistleriniň ýerine ýetiren çykyşlarynyň içinden eriş-argaç bolup geçdi.

Garaşsyz, baky Bitarap Türkmenistan döwletimizi beýik ösüşlere besläp, şan-şöhratyny dünýä ýaýýan Gahryman Arkadagymyzyň, agzybirligiň, abadançylygyň, gülläp ösüşiň dünýä nusgalyk taglymatyny dowamat-dowam edip, halkymyzy röwşen geljege alyp barýan Arkadagly Gahryman Serdarymyzyň adyna alkyş sözleri aýdym-sazly dabaranyň bütin dowamynda belentden ýaňlandy.