Magtymguly Pyragynyň doglan gününiň 300 ýyllygy mynasybetli Balkanabat şäherindäki daşary ýurt dillerine ýöriteleşdirilen 3-nji orta mekdepde welaýat Baş bilim müdirliginiň, Ylym we bilim işgärleriniň kärdeşler arkalaşygynyň Balkanabat şäher geňeşiniň bilelikde guramaklarynda «Uzyn saçly gyzlar» atly bäsleşigiň welaýat tapgyry geçirildi.

Orta mekdepleriň 7 — 11-nji synplarynda okaýan okuwçy gyzlaryň arasynda gyz edebiniň gözelligini ýaýmagy, türkmen gyzlaryna mahsus bolan saçlaryny gorap saklamagy, Magtymguly Pyragynyň «Gözel sen» diýen goşgusynda waspy ýetirilýän gözellikleri wagyz etmegi maksat edinen bäsleşik üç şertden ybarat boldy. Onuň şertlerine laýyklykda, gyzlar öz saçlaryny çeper sözde wasp etdiler. Saça oňat ideg edip saklamak, onuň tarlarynyň gyrylmagynyň öňüni almak baradaky yrymlary, aýtgylary aýtdylar. Emin agzalary tarapyndan berlen sowallara dogry jogap berdiler. Özlerine okamak, öwrenmek üçin ähli şertleri döredýän Gahryman Arkadagymyza we Arkadagly Gahryman Serdarymyza tüýs ýürekden alkyş aýtdylar.

Bäsleşigiň jemi jemlenilende, gyzlaryň ýaş aýratynlyklaryna görä baha berildi. Netijede, Balkanabat şäherindäki 3-nji orta mekdebiň okuwçysy Nowça Annamämmedowa, şol şäherdäki 7-nji orta mekdebiň okuwçysy Aýjemal Mejidowa, Türkmenbaşy şäherindäki 5-nji orta mekdebiň okuwçysy Medine Myradowa birinji orunlara mynasyp boldular. Balkanabat şäheriniň Gumdag şäherçesindäki 32-nji orta mekdebiň okuwçysy Gülzada Hajyýewa, Balkanabat şäherindäki 22-nji orta mekdebiň okuwçysy Bibimerýem Gurbanowa ikinji, Etrek etrabyndaky 4-nji orta mekdebiň  okuwçysy Nurana Gylyçdurdyýewa, Gyzylarbat etrabyndaky 29-njy orta mekdebiň okuwçysy Oguljennet Gurbangeldiýewa hem-de şol etrapdaky 16-njy orta mekdebiň okuwçysy Täzegül Hydyrowa üçünji orunlary eýelediler. 

Welaýat merkezindäki «Türkmeniň ak öýi» binasynda «Türkmenhaly» döwlet birleşiginiň, Türkmenistanyň Zenanlar birleşiginiň Merkezi geňeşiniň, Türkmenistanyň Kärdeşler arkalaşyklarynyň Milli merkeziniň bilelikde yglan eden «Türkmen halysy — milli buýsanjymyz» atly haly we haly önümleriniň sergi bäsleşiginiň welaýat tapgyry geçirildi.

«Pähim-paýhas ummany Magtymguly Pyragy» ýylynda ýurdumyzda giňden belleniljek Türkmen halysynyň baýramy mynasybetli hem-de türkmen zenanlarynyň görelde mekdebine öwrülen Gahryman Arkadagymyzyň käbesi Ogulabat ejäniň we Arkadagly Gahryman Serdarymyzyň ejesi, Türkmenistanyň at gazanan halyçysy Ogulgerek gelnejäniň el işleriniň nusgalaryndan ugur alyp, ýurdumyzyň çeper halyçylyk kärhanalarynda zähmet çekýän gelin-gyzlaryň arasynda geçirilen bäsleşik halkymyzyň ruhy we medeni mirasyny aýawly saklamagy we wagyz etmegi, ýaş halyçylaryň has ökdelerini ýüze çykarmagy, olaryň bu käre bolan höwesini artdyrmagy hem-de bu kesp-käri ýaş gyzlaryň dowam etdirmegini gazanmagy maksat edindi.

«Syrlardan dokalan gözellik», «El bilen döredilen gudrat» we «Gözellik dowamaty» atly şertler boýunça bäsleşen halyçylar haly we haly önümlerinden sergi gurnadylar. Gahryman Arkadagymyzyň «Janly rowaýat», «Arşyň nepisligi» atly kitaplaryna esaslanyp, haly sungatyna bolan buýsançlaryny beýan etdiler. Haly önümleriniň görnüşleri we gelip çykyşlary, tebigy reňkleriň hem-de ýüň ýüplüginiň taýýarlanylyşy barada gürrüň berdiler. Haly önümleri bilen toý kejebesini bezediler. Ene-mamalarymyzdan dowam edip gelýän ajaýyp sungaty içgin öwrenmäge, dünýä ýaýmaga we ýaş nesillere ýetirmäge giň ýollary açan Gahryman Arkadagymyza we Arkadagly Gahryman Serdarymyza bolan alkyşlaryny gazallaryň, goşgularyň üsti bilen beýan etdiler.

Netijede, Esenguly etrabyndan halyçy Bibisoltan Sarygulyýewa we Gyzylarbat çeper halyçylyk kärhanasynyň halyçysy Oguljeren Orazgulyýewa birinji, Esenguly etrabyndan halyçy Gülşen Berdigylyjowa we şol etrabyň 10-njy orta mekdebiniň mugallymy Hojabibi Goçmyradowa ikinji, Bereket çeper halyçylyk kärhanasynyň halyçylary Jumagül Saparmämmedowa we Baýramsoltan Gapurowa üçünji orunlara mynasyp boldular.

Bäsleşikde birinji we ikinji orunlary eýelän halyçylar onuň döwlet tapgyryna gatnaşarlar. 

Balkan atçylyk sport toplumynda Türkmen bedewiniň milli baýramynyň şanyna uludan tutulan dabaralar milli gymmatlyklarymyza buýsanjyň özboluşly subutnamasyna öwrüldi. Baýramçylyk ýörişi bilen badalga alan toý çäreleri türkmen halkynyň dünýäniň medeni ösüşine goşan uly goşandynyň anyk mysaly bolan behişdi bedewlerimize bolan hormat-sarpanyň nusgalykdygyny aýdyň görkezdi. Toplumyň esasy girelgesiniň öňündäki ak öýleriň owadan hatary bilen bezelen meýdançada welaýat, Balkanabat şäher häkimlikleriniň, welaýat medeniýet müdirliginiň, jemgyýetçilik guramalarynyň tagallalary bilen guralan medeni çäreler giňden ýaýbaňlandyryldy. Belentden ýaňlanyp, Arkadagly Gahryman Serdarymyzyň beýik tutumlary, üsti şemally bedewlerimiz joşgun bilen wasp edilen aýdym-sazlar, dutar-gyjagyň hoş owazy, milli tanslar, folklor çykyşlary, görkezilen sahnalar dabaranyň mazmun baýlygyny artdyrdy. Milli oýunlar hem-de sportuň dürli görnüşleri boýunça geçirilen ýaryşlar baýramçylygyň täsirli pursatlarynyň üstüni ýetirdi. Bu ýerde guralan sergide ýerleşdirilen at esbaplaryny, bezeg şaýlaryny, atşynaslyk sungatynyň milli ýörelgelerini beýan edýän işleri, amaly-haşam işlerini hem-de muzeý gymmatlyklaryny toý çäresine gatnaşyjylar uly gyzyklanma bilen synladylar.   

Şeýle göwün göteriji pursatlardan ruhy lezzet alan dabara gatnaşyjylar soňra baýramçylyk at çapyşyklaryna tomaşa etdiler. Üçýaşar atlaryň arasynda 1200 metr aralyga geçirilen birinji çapyşykda 1 minut 27 sekunt wagt görkezip, «Nur önümçilik» söwda gurluşyk hojalyk jemgyýetine degişli Nurly diýen gara at, üçýaşar bedewleriň arasynda ýene-de şol aralyga guralan ikinji çapyşykda welaýat Polisiýa müdirligine degişli Albedewim diýen al at 1 minut 25 sekunt, dört we ulyýaşar atlaryň gatnaşmagynda 1800 metr aralyga geçirilen üçünji çapyşykda welaýat agyz suw müdirligine degişli Näzli diýen al gysrak 2 minut 14 sekunt, dört we ulyýaşar atlaryň arasynda şol aralyga geçirilen dördünji çapyşykda bolsa Röwşen Hyrryýewiň hojalygyna degişli Körpäm diýen dor bedew 2 minut 18 sekunt wagtlary görkezip, pellehanadan birinji bolup geçmegi başardylar.

         Hormatly Prezidentimiziň baş baýragyny almak ugrunda geçirilen bäşinji çapyşyga gatnaşan dört we ulyýaşar bedewler hem 1800 metr aralykda ýyndamlyklaryny görkezdiler. Aýratyn uly şowhuna beslenen bu çapyşyk diýseň çekeleşikli häsiýete eýe bolup, 2 minut 13 sekuntda pellehana gelmegi başaran welaýat Polisiýa müdirliginiň Sazanda-II diýen gara dor bedewi baş baýragy eýelemegi başardy. Bedewiň çapyksuwaryna 50 müň manat hem-de «Zemin» telewizory janköýerleriň al-asmana göterilen şowhunly sesleriniň astynda dabaraly ýagdaýda gowşuryldy.

Türkmen bedewiniň milli baýramynyň barha ýakynlaşýan günlerinde, has takygy, geçen ýekşenbe güni Balkan  atçylyk sport toplumynda «Pähim-paýhas ummany Magtymguly Pyragy» ýylynyň  ýazky at çapyşyk möwsüminiň nobatdaky at çapyşygy geçirildi.        

             Atçylyk sport toplumynyň öňündäki baýramçylyk ruhunda bezelen ajaýyp meýdançada  guralan dabaralar türkmen toýlaryna mahsus ýokary ruhubelentlige beslendi. Giňden ýaýbaňlandyrylan dürli medeni-sport çärelerinden, joşgunly ýaňlanan aýdym-sazlardan ruhy lezzet alan dabara gatnaşyjylar soňra gyzykly at çapyşyklaryna uly höwes bilen tomaşa etdiler.

            Ilkinji çapyşyk üçýaşar atlaryň arasynda bolup, onda bedewler 1200 metr aralyga güýç synanyşdylar. Bu çapyşykda Perhat Allaberdiýewiň hojalygyna degişli Mizan diýen dor ata taý tapylmady. Ol bellenilen aralygy 1 minut 32,5 sekuntda geçmegi başardy.  

            Üçýaşar bedewleriň arasynda geçirilen ikinji çapyşyk hem 1200 metr aralygy öz içine aldy. Janköýerleriň şowhuny astynda geçen bu çapyşykda 1 minut 30,7 sekunt netije görkezen Dorsakar diýen dor at birinji bolup pellehana gelmegi başardy. Ol Gurbanmuhammet Germangulyýewiň hojalyk atydyr.  

            Üçünji çapyşyk hem 1200 mert aralyga üçýaşar atlaryň arasynda geçirilip, diýseň gyzykly bolan bu çapyşykda Arslan Täzäýewiň Aýbike atly bedewi öňdeligi eýelemegi başardy. Onuň görkezen wagty 1 minut 28,6 sekunda deň boldy.  

            Dördünji çapyşyk dört we ulyýaşar bedewleriň arasynda geçirilip, ol 1400 metr aralygy öz içine aldy. Bu çapyşykda Türkmenistanyň Energetika ministrliginiň Mazmun diýen aty  pellehana 1 minut  50,5 sekuntda gelmegi başaryp, ähli bedewlerden öňe saýlandy.  

           1400 metr aralyga guralan bäşinji çapyşykda Seýitguly Tülegenowyň  Dagýyldyz atly gyr atyna taý tapylmady. Bu at bellenilen aralygy 1 minut 47 sekuntda geçdi.  

           1800 metr aralyga geçirilen altynjy çapyşykda Körpe atly bedew bellenilen aralygy 2 minut 22,4 sekuntda geçip, iň gowy netijäni görkezdi. Ol Seýitmuhammet Orazmuhammedowyň hojalygyna degişlidir.  

          Jemleýji ýedinji çapyşyk has-da çekeleşikli bolup, ol hem 1800 metr aralyga geçirildi. Dört we ulyýaşar atlaryň arasynda çekeleşikli geçen ýaryşda Amanmyrat Ýazmyradowyň Ýagmyr atly aty ýaryşyň bütin dowamynda öňdeligi elden bermedi. Ol bu çapyşykda 2 minut 18,5 sekunt netije görkezip, birinji bolup pellehanadan geçdi.  

           Çapyşyklarda öňe saýlanan bedewlere serpaýlar ýapylyp, olaryň çapyksuwarlaryna welaýatymyzyň etrap-şäher häkimlikleriniň goýan gymmatbahaly sowgatlary  dabaraly ýagdaýda gowşuryldy.

Welaýat medeniýet müdirligi hem-de Türkmenistanyň Kärdeşler arkalaşyklarynyň welaýat birleşmesi tarapyndan welaýat döwlet drama teatrynda welaýatymyzyň halk teatrlarynyň we halk gurjak teatrlarynyň arasynda «Sahna ussatlygy ynsan çyragy, müdimisiň Magtymguly Pyragy» atly bäsleşik geçirildi.

Teatrlaryň döredijilik işini has-da kämilleşdirmek, olarda sahnalaşdyrylýan oýunlaryň halkymyzyň milli ruhuna mahsus, döwrebap mazmuna eýe bolmagyny gazanmak, şeýle-de sungat işgärlerini döredijilik üstünliklerine höweslendirmek, ýaş zehinleri ýüze çykarmak maksady bilen geçirilen bäsleşik ýokary ruhubelentlige beslendi. Onuň şertlerine laýyklykda, artistler Gahryman Arkadagymyzyň, Arkadagly Gahryman Serdarymyzyň  eserleri esasynda sahnalaşdyrylan, şeýle-de Berkarar döwletiň täze eýýamynyň Galkynyşy döwründe gazanylýan üstünlikleri, milli medeniýetimiziň gymmatlyklaryny wasp edýän hem-de akyldar şahyrymyz Magtymguly Pyragynyň keşbini janlandyrýan sahna oýunlary bilen çykyş etdiler.

Bäsleşikde halk teatrlarynyň arasynda Bereket etrap medeniýet bölüminiň halk teatry birinji orna, Magtymguly etrap medeniýet bölüminiň halk teatry ikinji orna, Balkanabat şäher medeniýet bölüminiň Hazar şäherçesiniň «Döwürdeş» halk teatry üçünji orna mynasyp boldular. Gurjak teatrlarynyň arasynda bolsa Magtymguly etrap medeniýet bölüminiň halk gurjak teatry birinji, Türkmenbaşy şäher medeniýet bölüminiň «Ýartygulak» halk gurjak teatry ikinji orunlary eýlediler.

Bäsleşigiň ýeňijilerine sowgatlar, şeýle-de tapawutlanan döredijilik işgärlerine höweslendiriji baýraklar dabaraly ýagdaýda gowşuryldy.