Hormatly Prezidentimiziň 13-nji fewralda geçiren Ministrler Kabinetiniň giňişleýin mejlisinde 2026-njy ýylyň «Garaşsyz, baky Bitarap Türkmenistan — bedew batly at-myradyň mekany» ýyly diýlip yglan edilmegi mynasybetli atçylyk we atly sport ugurlary boýunça çäreleriň Maksatnamasynyň işlenip taýýarlanandygyny aýdyp, bu ugurda degişli resminama gol çekmegi aýratyn ähmiýete eýe boldy. Munuň özi şanly ýylyň ilkinji aýynda Monte-Karlo şäherinde geçirilen halkara sirk sungaty festiwalynda sirk sungatyna goşan uly goşandy üçin «Galkynyş» milli at üstündäki oýunlar toparyna Bütindünýä sirk federasiýasy hem-de Ýewropa Sirk assosiasiýasy tarapyndan halkara şahadatnamalaryň gowşurylmagynyň şanyna Balkanabat şäherinde geçirilen dabaraly çäreleriň ýokary guramaçylygynyň gözbaşyna öwrüldi.   

Hakyky türkmen toýlaryna mahsus şatlyk-şowhuna, ruhubelentlige beslenen dabaraly çäreler «Galkynyş» milli at üstündäki oýunlar toparynyň agzalarynyň welaýat Taryhy we ülkäni öwreniş muzeýiniň öňünde milli däp-dessurlarymyza laýyklykda duz-çörek bilen garşylanmagy arkaly badalga aldy. Bu ýerde joşgunly aýdym-sazlar belentden ýaňlanyp, dabaranyň şowhunyny artdyran medeni çykyşlarda Gahryman Arkadagymyzyň, Arkadagly Gahryman Serdarymyzyň beýik özgertmeleriniň, behişdi ahalteke bedewleriniň, şanly ýylyň beýik tutumlary taryplandy. Halkymyzyň ýagşy yrym-ýörelgesine eýerilip, «Galkynyş» toparyna dagdan agajyndan ýasalan nalyň gowşurylmagy aýratyn ýatda galyjy boldy. Şeýle-de, toparyň agzalary bu ýerde ýaýbaňlandyrylan milli atçylyk sungatyna, amaly-haşam, el işlerine degişli sergini synlap, çäksiz ruhy lezzet aldylar.

Şunuň ýaly täsirli çärelerden soňra toparyň agzalary asman atlaryna deňelen ahalteke bedewlerine atlanyp, şäheriň döwrebap şaýoly boýunça guran toý ýörişi arkaly «Türkmeniň ak öýi» binasyna tarap ugur aldylar. Ýörişiň dowamynda şöhraty ýedi yklyma dolan toparyň agzalaryny şaýoluň ikiýan gyrasyny dolduran toý mähellesi alkyşly sözler, şowhunly el çarpyşmalar bilen mübäreklediler. Toý ýörişiniň dowamynda guralan medeni çäreler dabaraly ýörişiň şowhunyny has-da artdyrdy. Welaýatymyzyň döredijilik tans toparlarynyň gelin edinmek dessuryndan görkezen parçalary, sungat ussatlarynyň edebi-sazly kompozisiýalary hemmelerde ýakymly duýgulary döretdi.   

«Türkmeniň ak öýi» binasynyň öňünde ýaýbaňlandyrylan medeni çykyşlar dabaraly çäreleriň mazmun baýlygynyň üstüni ýetirip, halkymyzyň gamyşgulak bedewlerimize bolan çäksiz buýsanjynyň, türkmen bedewleriniň dünýä dolan şan-şöhratyny öňküdenem belende göterýän Milli Liderimize hem-de hormatly Prezidentimize bolan egsilmez alkyş sözleriniň mynasyp beýanyna öwrüldi. Ýürekleriň töründen çykýan şeýle hoşallyk sözleri «Türkmeniň ak öýi» binasynyň ajaýyp sahnasynda dowam eden buýsançly çykyşlaryň, belent heňlerde ýaňlanan aýdym-sazlaryň, ýerine ýetirilen küştdepdidir gazallaryň içinden hem eriş-argaç bolup geçdi. Çykyşlaryň çuňňur mazmunynda beýan edilişi ýaly, «Galkynyş» milli at üstündäki oýunlar toparynyň gazanýan üstünlikleri Gahryman Arkadagymyzyň, Arkadagly Gahryman Serdarymyzyň türkmen halkynyň milli guwanjy, buýsanjy bolup durýan ahalteke bedewlerine bolan nusgalyk söýgi-sarpasynyň miwesidir. Şeýle hormat-sarpa bedewlerimiziň şan-şöhratyny belende göterip, «Galkynyşy» täze üstünliklere ruhlandyrýar.

Dabarada «Galkynyş» toparynyň täsirli çykyşlaryna orun berilmegi aýratyn ýatda galyjy boldy. Toparyň agzalarynyň çapyp barýan bedewleriň üstünde ussatlyk bilen ýerine ýetirýän oýunlary, çalasyn hereketleri hemmeleri haýran galdyrdy. Olaryň çykyşlary dowamly ýaňlanan el çarpyşmalar bilen garşylandy. Sungat ussatlarynyň bedewlere atlanyp, ýerine ýetiren şirin aýdymlary dabaranyň täsirli pursatlarynyň üstüni ýetirdi.     

         «Garaşsyz, baky Bitarap Türkmenistan — bedew batly at-myradyň mekany» ýylyna bezeg berýän çuň mazmunly çäreleriniň hatarynda mynasyp orun alan dabaraly çäreler welaýatymyzyň ilatynyň Gahryman Arkadagymyzyň hem-de Arkadagly Gahryman Serdarymyzyň döwletli tutumlaryna bolan ýürek buýsanjyny ýene bir ýola tassyklady.

Dabaralar tamamlanandan soňra, Balkanabat şäherindäki «Türkmeniň ak öýi» binasynyň köpçülikleýin dabaralar geçirilýän ýerinde toý sadakasy berildi.                          

Türkmenistanyň Zenanlar birleşiginiň Merkezi geňeşiniň hem-de Türkmenistanyň Kärdeşler arkalaşyklarynyň Milli merkeziniň bilelikde yglan eden «Hünärim bar, hormatym bar» atly bäsleşiginiň jemleýji tapgyry paýtagtymyzdaky Jemgyýetçilik guramalarynyň merkezinde geçirildi.

Gahryman Arkadagymyzyň käbesi Ogulabat ejäniň nusgalyk sungatyndan görelde alyp, el hünäriniň mynasyp dowam etdirilmegine goşant goşmak maksady bilen, dürli edara-kärhanalarda zähmet çekýän çeper elli zenanlaryň arasynda guralan bäsleşik üç şertden ybarat bolup, birinji şertde oňa gatnaşyjylar ýurdumyzyň ösüşleri, zenan mertebesi, milli mirasymyzyň, sungatymyzyň sarpasy barada buýsanç bilen söhbet etdiler. 30 minutyň dowamynda gyzjagazlar üçin niýetlenen köýnegi biçip hem tikip görkezmekden ybarat bolan ikinji şert has-da täsirli boldy. Bu şertde bäsleşige gatnaşyjylar milli lybaslarymyz, olara salynýan nagyşlaryň manysy, köýneklik matanyň saýlanyp alnyşy barada hem gürrüň berdiler. Üçünji şertde bäsleşige gatnaşyjylar öz tiken eşikleriniň esasynda döwrebap milli lybaslarymyzyň görkezilişini gurap, olary çeper wasp etdiler.

Şeýlelikde, «Hünärim bar, hormatym bar» atly bäsleşigiň jemleýji tapgyrynda baş baýraga welaýatymyzyň ezber elli zenanlary mynasyp bolmagy başardylar. Birinji orny Mary welaýatynyň, ikinji orny Aşgabat, Arkadag şäherleriniň, üçünji orny Ahal, Daşoguz, Lebap welaýatlarynyň gelin-gyzlary eýelediler. 

Türkmenistanyň Zenanlar birleşiginiň Merkezi geňeşiniň we Türkmenistanyň Kärdeşler arkalaşyklarynyň Milli merkeziniň bilelikde yglan eden «Hünärim bar — hormatym bar» atly bäsleşiginiň welaýat tapgyry Balkanabat şäherindäki «Türkmeniň ak öýi» binasynda geçirildi.

Amaly-haşam sungatynyň nusgalaryndan ugur alyp, tutanýerli zähmet çekýän we tikinçilik bilen meşgullanýan, el işlerini ýerine ýetirmekde, milli lybaslary biçip-tikmekde görelde görkezýän tikinçi zenanlaryň arasynda yglan edilen bäsleşige onuň deslapky tapgyrlarynda öňe saýlanan gelin-gyzlar gatnaşdylar. Zenanlaryň ene-mamalarymyzdan dowam edip gelýän tikinçilik sungatyna bolan yhlas-başarnyklaryny açyp görkezmegi, olaryň hünär ussatlygyny kämilleşdirmegi, zähmet öndürijiligini artdyrmagy, Watanymyza, halkymyza, Gahryman Arkadagymyza we hormatly Prezidentimize bolan belent söýgi-buýsanjyny, ýaş nesillere görkezýän göreldesini wagyz etmegi maksat edinen bäsleşik üç şertden ybarat boldy.

Bäsleşige gatnaşan zenanlar şertlere laýyklykda, öz el hünärlerini ýaş gyzlara öwretmekde alyp barýan işlerini, tikýän milli lybaslarynyň aýratynlyklaryny gürrüň berdiler. Bellenilen wagtyň dowamynda gyzjagazlara köýnek biçip-tikdiler. Milli lybaslary taýýarlaýyşlary we olara salan gadymy nagyşlaryndaky syrly şekiller barada çeper söz bilen beýan etdiler. «Elimden çykan egnime ýarar» diýlen aýtgydan ugur alyp, keşdelän lybaslaryny geýnip, goşgularda, gazallarda tarypladylar.

Netijede, Balkanabat şäherindäki daşary ýurt dillerine ýöriteleşdirilen 3-nji orta mekdebiň mugallymy Oguljeren Rejebowa, Esenguly etrabyndaky 6-njy orta mekdebiň mugallymy Gülzar Baýramowa we Bereket etrabyndaky 19-njy orta mekdebiň mugallymy Nurjemal Täçmämmedowa birinji orunlara mynasyp bolup, olar bu bäsleşigiň döwlet tapgyryna gatnaşmaga hukuk gazandylar.

Bäsleşige gatnaşanlaryň ählisine Türkmenistanyň Kärdeşler arkalaşyklarynyň welaýat birleşmesiniň sowgatlary gowşuryldy.

Welaýat häkimliginiň mejlisler jaýynda Türkmenistanyň Zenanlar birleşiginiň welaýat bölüminiň hasabat ýygnagy geçirildi. Oňa Zenanlar birleşiginiň welaýat bölüminiň geňeş agzalary, ilkinji zenanlar guramalarynyň başlyklary we işjeň agzalary, mährem eneler we ýaşlar gatnaşdylar.

«Zenan mähek daşydyr» diýen pähime eýeren pederlerimiz zenan mertebesini hemişe gorap gezipdirler, aýal-gyzlaryň jemgyýetde tutýan ornuna ýokary baha beripdirler. Bu asylly ýörelge häzirki wagtda döwrebap many-mazmun bilen baýlaşdyrylyp, dowam etdirilýär. Zenanlara mukaddes öý-ojagyň synmaz sütüni, ahlak gözelliginiň ajaýyp nusgasy hökmünde uly hormat-sarpa goýulýar.

Ýurdumyzda ähli ugurlarda gazanylýan ajaýyp üstünliklere zenanlar saldamly goşantlaryny goşýarlar, kabul edilýän maksatnamalaryň ýerine ýetirilmegi üçin tutanýerli zähmet çekýärler, jemgyýetiň agzybirligini berkitmekde, sagdynlygyny goramakda, beden we ruhy taýdan sagdyn nesli terbiýeläp ýetişdirmekde nusgalyk görelde görkezýärler.

Hasabat ýygnagynyň dowamynda edilen çykyşlarda şular barada aýdyldy. Şeýle-de geçen ýylyň dowamynda ýerine ýetirilen işlere seljerme berildi. «Garaşsyz, baky Bitarap Türkmenistan — bedew batly at-myradyň mekany» ýylynda öňde durýan wezipeler ara alnyp maslahatlaşyldy. Zenanlara uly hormat-sarpa goýýan, olaryň ýaşaýyş-durmuş şertleriniň has-da ýokarlanmagy ugrunda taýsyz tagallalary edýän Gahryman Arkadagymyza we hormatly Prezidentimize tüýs ýürekden alkyş aýdyldy.

«Awaza» milli syýahatçylyk zolagyndaky Türkmenistanyň Kärdeşler arkalaşyklarynyň Milli merkeziniň «Daýanç» sagaldyş merkezinde Türkmenistanyň Zenanlar birleşiginiň Merkezi geňeşiniň hem-de welaýat bölüminiň birleşen tagallasy bilen okuw maslahaty geçirildi.

«Bedew batly zamananyň bagtyýar zenanlary» ady bilen geçirilen okuw maslahaty bäş günläp dowam etdi. Oňa Türkmenistanyň Zenanlar birleşiginiň Merkezi geňeşiniň we welaýat bölüminiň geňeş agzalary, ilkinji zenanlar guramalarynyň başlyklary we agzalary, welaýat halk maslahatynyň agzalary, hukuk goraýjy edaralaryň işgärleri we mährem eneler gatnaşdylar.

Okuw maslahatynyň maksady Türkmenistanyň Zenanlar birleşiginiň işini kämilleşdirmekden, ösdürmekden we döwrebaplaşdyrmakdan ybarat bolup, onuň çäklerinde Türkmenbaşydaky nebiti gaýtadan işleýän zawodlar toplumynyň medeni-sport toplumynda «Garaşsyz, baky Bitarap Türkmenistan — bedew batly at-myradyň mekany» ýyly mynasybetli aýdym-sazly dabaraly maslahat, şeýle-de dürli ýerlerde «Häzirki zaman jemgyýetinde zenanlaryň orny: Durnukly ösüş maksatlaryna ýetmek ugrunda halkara hyzmatdaşlygy ösdürmek», «Zenanlar — Zeminiň zynaty» atly maslahatlar, söhbetdeşlikler geçirildi. Türkmen gelin-gyzlarynyň el işleriniň, amaly-haşam sungatynyň sergileri guraldy. Okuw maslahatynyň tutuş dowamynda geçirilen şeýle çärelerdir sergilerde, tegelek stoluň başyndaky söhbetdeşliklerde zenanlaryň jemgyýetde tutýan ornunyň ýokarydygy barada buýsanç bilen adyldy. Şeýle-de zenanlaryň ýurdumyzyň durmuş-ykdysady taýdan ösüşine mynasyp goşant goşýandyklary, ýaş nesli milli ruhda terbiýelemekde, medeniýeti we sungaty, ylym-bilimi, telekeçiligi ösdürmekde halal zähmetiň nusgasyny görkezýändikleri bellenildi. Zenanlaryň mümkinçiliklerini ösdürmek bolsa, döwlet syýasatynyň ileri tutulýan ugurlarynyň biri bolmagynda galýar.

Ajaýyp döwrümiziň «Garaşsyz, baky Bitarap Türkmenistan — bedew batly at-myradyň mekany» ýylynda hem Gahryman Arkadagymyzyň we döwlet Baştutanymyzyň taýsyz tagallalary bilen ata Watanymyz täze ösüşlere badalga aldy. Bagtyýar zenanlarymyzam döwrümiziň bezegi bolup, eşretli durmuşyň hözirini görýärler we döredýän şert-mümkinçilikleri üçin Milli Liderimize, hormatly Prezidentimize tüýs ýürekden alkyş aýdýarlar. Okuw maslahatynyň tutuş dowamynda şular dogrusynda giňişleýin bellenildi. Gahryman Arkadagymyza, Arkadagly Gahryman Serdarymyza alkyşlar dilleriň senasyna öwrüldi.