Bilimler we talyp ýaşlar gününe hem-de täze, 2025-2026-njy okuw ýylynyň başlanmagyna bagyşlanyp geçirilen dürli mazmunly çäreler welaýatymyzda biri-birine ulaşdy. Welaýat merkezindäki iňlis dili dersine ýöriteleşdirilen 25-nji orta mekdepde guralan dabara bilim baýramynyň şowhunyny has-da artdyrdy. Dabarada Arkadagly Gahryman Serdarymyzyň Garaşsyz, hemişelik Bitarap Türkmenistanyň mekdep okuwçylaryna, talyp ýaşlaryna, mugallymlaryna we bilim işgärlerine iberen Gutlagynyň okalmagy aýratyn ýatda galyjy boldy. Baýramçylyk ruhunda bezelen mekdepde aýdym-sazyň owazy belentden ýaňlanyp, Bilimler we talyp ýaşlar güni, täze okuw ýylynyň başlanmagy mynasybetli çykyşlar giňden ýaýbaňlandyryldy.

 Olarda bellenişi ýaly, ýurdumyzyň ösüşini ylym-bilimli, hünärli ýaşlarda görýän, olara uly bil baglaýan, ynam bildirýän hormatly Prezidentimiziň parasatly baştutanlygynda bilim özgertmeleri rowaçlyklara beslenýär. Berkarar döwletiň täze eýýamynyň Galkynyşy döwründe  bilim-terbiýe bermek, hünär öwretmek milli ýörelgelere, dünýä tejribesine, öňdebaryjy usullara, sanly bilimiň giň mümkinçiliklerine daýanýar. Munuň özi oňyn netijelerini hem berýär. Ýaşlarymyzyň halkara bilim bäsleşiklerine gatnaşyp, üstünlikli çykyş etmegini bu ugurda döwlet derejesinde edilýän tagallalaryň miwesi hasaplamak bolar. Her ýylyň 1-nji sentýabrynda döwrebap enjamlar bilen üpjün edilen täze bilim ojaklarynyň ulanylmaga berilmegi ýurdumyzda ylym-bilimli, hünärli, beden taýdan sagdyn, ruhy taýdan kämil ýaş nesliň kemala gelmegi baradaky aladany öz içine alýar. Ýokary ruhubelentlige beslenen dabarada edilen çykyşlarda şular barada aýratyn nygtalmak bilen, ylym-bilimi ösdürmek babatda uly işleri alyp barýan türkmen halkynyň Milli Lideri Gahryman Arkadagymyzyň, hormatly Prezidentimiz Arkadagly Gahryman Serdarymyzyň janlarynyň sag, ömürleriniň uzak bolmagy, belent tutumlarynyň rowaç bolmagy arzuw edildi.

Aýdym-sazlara beslenen dabarada edilen buýsançly çykyşlardan soň,  ilkinji jaň kakyldy. Munuň özi Diýarymyzyň geljegi bolan ýaş nesli ylymlar dünýäsinde döwrebap bilim almaga, alan bilimlerini has-da kämilleşdirmäge, ata Watanymyza mynasyp, ilhalar adamlar bolup ýetişmäge çagyryş bolup ýaňlandy. Ýurdumyzyň hemişelik Bitaraplygynyň 30 ýyllygynyň bellenilýän ýylynda 1-nji synpa barýan okuwçylara hormatly Prezidentimiziň hem-de Gahryman Arkadagymyzyň adyndan «Bilimli» atly kompýuterleriň sowgat  berilmegi aýratyn ýatda galyjy pursatlary özünde jemledi.

Ak mekdebiň gujagyna dolan okuwçylar bilen «Halkara parahatçylyk we ynanyşmak ýyly» diýen şygar astynda geçirilen ilkinji okuw sapagynda Birleşen Milletler Guramasy  tarapyndan üç gezek ykrar edilen Bitaraplygymyzyň, ýurdumyzyň halklaryň arasynda dost-doganlygy, parahatçylygy pugtalandyrmak, netijeli hyzmatdaşlygy ösdürmek babatda alyp barýan tutumly işleriniň mazmuny öz beýanyny tapdy. 

Welaýatymyzyň şäherleridir etrap merkezlerinde, şäherçeleridir obalarynda guralan mekdep bazarlarynyň her gün müşderileri ýetik. Bu bazarlarda şu ýyl ilkinji gezek ak mekdepleriň bosagasyndan ätlejek bagtyýar körpelerden başlap, ýokary synp mekdep okuwçylaryna çenli niýetlenilen harytlaryň bolçulygy göwnüňi göterýär. Olaryň ählisiniň diýen ýaly öz ýurdumyzda öndürilen ýokary hilli okuw esbaplardyr egin-eşiklerdigi bolsa kalbyňdaky buýsanç duýgularyny artdyrýar. Mekdep bazarlaryndaky harytlaryň hatarynda türkmen telekeçileriniň önümlerine uly orun berilmegi has-da guwandyryjydyr. Munuň özi hormatly Prezidentimiziň ýurdumyzda kiçi we orta telekeçiligi giňden goldamak baradaky  taýsyz tagallalarynyň ýerine düşýändiginiň kepilidir. 

Depderleriň, suratdyr çyzuw albomlarynyň, gollanmalaryň we beýleki neşir önümleriniň Türkmen döwlet neşirýat gullugynyň kärhanalarynda ýokary hilli öndürilendigini hem aýratyn nygtamak gerek. Ýurdumyzyň dokma önümlerini öndürýän kärhanalarynyň hem-de Türkmenistanyň Senagatçylar we telekeçiler birleşmesiniň agzalarynyň milli mekdep lybaslarynyň, gyzlar üçin ýaşyl köýnekleriniň, akja öňlükleriniň, oglanlar üçin köýnekleriniň, penjekleriniň, jalbarlarynyň, köwüşleriň hyrydarlary ýetik. 

          Mekdep bazarlarynyň, okuwa degişli harytlary alyjylara hödürleýän söwda nokatlarynyň islendigine baryp görseň,  täze okuw ýylyna ýaşlar bilen birlikde, olaryň ata-eneleriniň hem ykjam taýýarlyk görýändiklerine  göz ýetirýärsiň. Çünki çagalarynyň ylymly-bilimli, giň dünýägaraýyşly, Watana, halka wepaly, hünärli adamlar bolup ýetişmekleri her bir ata-enäniň baş aladasydyr. 

Şu günler BMG-niň Deňze çykalgasy bolmadyk ösüp barýan döwletler boýunça üçünji maslahatynyň üstünlikli geçirilmegi mynasybetli welaýatymyzda çuň ýürekden çykýan hoşallyklara beslenen dabaraly maslahatlar biri-birine ulaşýar. Awaza forumynyň çäklerinde geçirilen zenan ýolbaşçylaryň duşuşygy mynasybetli welaýat häkimliginiň, Türkmenistanyň Zenanlar birleşiginiň welaýat bölüminiň bilelikde guran dabaraly maslahaty hem şeýle çäreleriň biri boldy. Welaýat häkimliginiň mejlisler jaýynda geçirilen maslahatda giň gerim berlen buýsançly çykyşlarda türkmen halkynyň Milli Lideri Gahryman Arkadagymyzyň hem-de hormatly Prezidentimiz Arkadagly Gahryman Serdarymyzyň taýsyz tagallalary bilen ýurdumyzda gender deňligi babatynda gazanan nusgalyk üstünlikleri dogrusynda durlup geçildi. Çykyşlarda zenanlaryň döwleti dolandyrmak işlerine erkekler bilen deň hukukly gatnaşmagynyň hukuk kepillikleriniň üpjün edilýändigi nygtaldy. Şunlukda, zenanlar ýurduň jemgyýetçilik-syýasy, durmuş-ykdysady, medeni durmuşyna işjeň gatnaşýarlar. Awaza forumynyň çäklerinde zenan ýolbaşçylarynyň duşuşygynyň geçirilmeginiň özem ýurdumyzda zenanlara goýulýan belent hormatyň, olara bildirilýän uly ynamyň nyşanydyr. Dabaraly maslahatda ýurdumyzyň bagtyýar zenanlaryna goýulýan nusgalyk hormat-sarpa üçin Gahryman Milli Liderimize hem-de hormatly Prezidentimize tüýs ýürekden çykýan hoşallyklar beýan edildi.

Şeýle buýsançly çykyşlaryň dowamy welaýatymyzyň sungat ussatlarynyň joşgunly aýdym-sazlaryna utgaşdy. Belent hörplerde ýerine ýetirilip, milli tanslar bilen bezelen şirin aýdym-sazlarda baky Bitaraplygymyzyň, Halkara parahatçylyk we ynanyşmak ýylynyň, Gahryman Arkadagymyzyň taryhy başlangyçlarynyň, Arkadagly Gahryman Serdarymyzyň beýik tutumlarynyň, zenanlaryň bagtyýarlygynyň waspy ýetirildi.

Şirin owazly aýdym-sazlar hemişe göwünleri ganatlandyrýar, ynsanlara ruhy lezzet paýlaýar. Aýdym-saz dünýäsinde täze zehinleri ýüze çykarmak maksady bilen geçirilýän bäsleşikleriň halkyň arasynda meşhur bolmagynyň düýp sebäbi hem şundadyr. Türkmenistanyň Prezidentiniň «Türkmeniň Altyn asyry» atly bäsleşiginiň çäklerinde geçirilýän «Ýaňlan, Diýarym!» telebäsleşigi hem şeýle bäsleşikleriň biri bolup, ol her ýylda şowhunly geçýän aýdym-saz baýramçylygyna öwrülýär. Bu telebäsleşigiň Halkara parahatçylyk we ynanyşmak ýylyndaky welaýat tapgyry Balkanabat şäherindäki «Türkmeniň ak öýi» binasynyň öňündäki gözel meýdançada geçirildi. Oňa «Ýaňlan, Diýarym! — 2025» telebäsleşiginiň etrap-şäher tapgyrlarynda ýeňiji bolan aýdymçylar gatnaşdylar.

Mukaddes Garaşsyzlygymyzyň şanly 34 ýyllygy mynasybetli geçirilýän telebäsleşigiň esasy maksady milli medeniýetimiziň we sungatymyzyň ösmegine mynasyp goşandyny goşýan zehinli, höwesjeň aýdymçy ýaşlary ýüze çykarmakdan we olaryň sungat äleminiň ussatlary bolup ýetişmekleri üçin döredilýän şertlerden ýerlikli peýdalanmaklaryny gazanmakdan, türkmen aýdym-saz sungatyny döwrebap aýdym-sazlar bilen baýlaşdyrmakdan ybaratdyr. Telebäsleşikde gezekli-gezegine çykyş eden aýdymçylar ata Watanymyzy, Gahryman Arkadagymyzyň we hormatly Prezidentimiziň ýurdumyzy gülledip ösdürmek, halkymyzyň bagtyýar geljegi ugrunda alyp barýan belent maksatly tutumlaryny, parahat we abadan durmuşymyzy wasp edýän aýdymlary, türkmen halk aýdymlaryny we täze, döwrebap estrada aýdymlaryny, şeýle-de Halkara parahatçylyk we ynanyşmak ýyly mynasybetli doganlyk halklaryň aýdymlaryny ýerine ýetirdiler. Uly joşgun bilen ýerine ýetirilen şirin aýdymlaryň her biri tomaşaçylar tarapyndan şowhunly el çarpyşmalar bilen garşylandy.

Şeýlelikde, emin agzalarynyň gelen netijesi boýunça Esenguly etrabynyň harby wekilliginiň gözegçisi Ýunus Aşyrdurdyýew we Gyzylarbat etrabynyň Tutly obasynyň ýaşaýjysy Öwezmyrat Ataýew «Ýaňlan, Diýarym! — 2025» telebäsleşiginiň welaýat tapgyrynyň ýeňijileri diýlip yglan edildiler. Olar bu bäsleşigiň döwlet tapgyryna gatnaşmaga hukuk gazandylar.

«Türkmennebit» döwlet konserniniň Türkmenbaşydaky nebiti gaýtadan işleýän zawodlar toplumynyň Kenar toplaýjy-ýükleýji nebit kärhanasynyň nebit we nebit önümleri guýulýan hem-de kabul edilýän täze 3-nji gämi duralgasy hormatly Prezidentimiziň sanly ulgam arkaly ak patasy bilen ulanmaga berildi.

Beýik Britaniýanyň «Petro Gas LLP» kompaniýasy bilen zawodlar toplumynyň arasynda baglaşylan şertnama laýyklykda gurlan täze desganyň ýyllyk kuwwaty nebit önümlerini ýüklemek boýunça 2 million 60 müň tonna, çig nebiti we nebit önümlerini düşürmek boýunça bolsa 1 million 150 müň tonna deňdir.

Täze gämi duralgasynda döwrebap zähmet we iş şertleri döredilip, ýangyn howpsuzlygynyň hem-de daşky gurşawy goramagyň düzgünleri  kämil enjamlaryň kömegi bilen awtomatlaşdyrylan usulda amala aşyrylýar. 

Desganyň ulanmaga berilmegi mynasybetli guralan dabaradan soňra toý sadakasy berlip, Gahryman Arkadagymyza hem-de Arkadagly Gahryman Serdarymyza berk jan saglyk, uzak ömür, ata Watanymyzyň gülläp ösmeginiň, eziz halkymyzyň has-da eşretli durmuşda ýaşamagynyň hatyrasyna alyp barýan beýik işlerinde mundan beýläk-de rowaçlyklar dileg edildi.