Ajaýyp zamanamyzyň häzirki nurana günleri kalplary şatlyga, buýsanja besleýän ajaýyp pursatlara baýlygy bilen tapawutlanýar. Watan goragçylarynyň güni mynasybetli Esenguly etrap merkezinde etrap prokuraturasynyň täze edara binasynyň dabaraly ýagdaýda ulanmaga berilmegi hem munuň aýdyň subutnamasy boldy.

          Iki  gatdan ybarat täze binanyň açylyş dabarasy uludan tutuldy. Oňa Türkmenistanyň Baş prokuraturasynyň jogapkär işgärleri, Türkmenistanyň Mejlisiniň deputatlary, welaýat, etrap häkimlikleriniň, syýasy partiýalaryň we jemgyýetçilik guramalaryň wekilleri, harby we hukuk goraýjy edaralaryň işgärleri, il sylagly ýaşulular gatnaşdylar.

Dabarada çykyş edenler ýurdumyzyň obalaryny, şäherçelerini, şäherlerini gözel görnüşe getirmek, dürli ulgamda zähmet çekýän hünärmenleriň iş şertlerini has-da gowulandyrmak barada edýän irginsiz aladalary üçin türkmen halkynyň Milli Lideri Gahryman Arkadagymyza hem-de hormatly Prezidentimiz Arkadagly Gahryman Serdarymyza tüýs ýürekden çykýan alkyş sözlerini aýtdylar.

         Açylyş dabarasynda medeni çärelere giň orun berlip, medeniýet we sungat ussatlary çykyş etdiler. Olaryň joşgunly çykyşlarynda Berkarar döwletiň täze eýýamynyň Galkynyşy döwründe ýurdumyzyň bedew badyndaky ösüşleri, hormatly Prezidentimiziň alyp barýan dünýä nusgalyk beýik işleri, bagtyýar durmuşymyz özüniň aýdyň beýanyny tapdy.   

           Esenguly etrap merkeziniň binagärlik we şähergurluşyk görküni has-da baýlaşdyran bu binany Türkmenistanyň Senagatçylar we telekeçiler birleşmesiniň agzasy «Rysgally zähmet» hususy kärhanasynyň gurluşykçylary ýokary hil ülňülerine laýyk gurmagy başarypdyrlar. Uludan tutulan dabaranyň dowamynda bu binanyň gurluşygynda zähmet çeken ussat gurluşykçylara hormatly Prezidentimiziň adyndan gymmatbahaly ýadygärlik sowgatlar gowşuryldy. 

            Ýaşuly nesliň ak patasy bilen toý bagy kesilenden soň, dabara  ýygnananlar Esenguly etrap  prokuraturasynyň  täze  edara binasynyň  içine aýlanyp, bu ýerde döredilen döwrebap amatlyklar bilen içgin tanyşdylar

           Watan goragçylarynyň güni mynasybetli Etrek etrap merkezinde Türkmenistanyň Döwlet gümrük gullugynyň Balkan welaýat gümrükhanasynyň «Altyn asyr» gümrük nokadynyň  işgärlerine  niýetlenen  dört  gatly, 2 we 3 otagly, 24 öýli  ýaşaýyş jaýy hem dabaraly ýagdaýda ulanmaga berildi.

            Täze ýaşaýyş jaýynyň açylyş dabarasynda çykyş edenler onuň gurluşygynyň häzirki zaman binagärliginiň iň öňdebaryjy talaplaryna laýyk  gelýändigini, ähli amatlyklary özünde jemleýändigini buýsanç bilen bellediler. Çykyşlarda aýratyn nygtalyşy ýaly, Arkadagly Gahryman Serdarymyz  halkymyzyň mynasyp ýaşaýyş-durmuşyny üpjün etmekde taýsyz tagallalary edýär. Bu durmuş hakykaty Berkarar döwletiň täze eýýamynyň Galkynyşy  döwründe barha giň gerime eýe bolýan medeni-durmuş maksatly binalaryň depginli dowam edýän gurluşyklarynda özüniň aýdyň beýanyny tapýar.

           Dabaranyň  dowamynda   medeniýet we sungat ussatlarynyň  ýerine ýetiren döwrebap aýdym-sazlary, joşgunly  çykyşlary oňa gatnaşanlara ruhy lezzet paýlady.

  Täze ýaşaýyş jaýynyň gurluşygyny Türkmenistanyň Senagatçylar we telekeçiler birleşmesiniň agzasy bolan «Gurat gurluşyk» hususy kärhanasynyň  gurluşykçylary alyp bardylar. Açylyş dabarasynda onuň gurluşygynda tapawutlanyp zähmet çeken gurluşykçylaryň birnäçesine hormatly Prezidentimiziň adyndan gymmatbahaly sowgatlar we öý eýelerine bolsa jaýlaryň açarlary dabaraly ýagdaýda gowşuryldy. Täze jaýlarda ýaşamak bagtyna eýe bolan gümrük işgärleri özleri barada, halkymyz hakynda edýän bimöçber aladalary üçin Gahryman Arkadagymyzyň hem-de Arkadagly Gahryman Serdarymyzyň adyna tüýs ýürekden çykýan alkyş sözlerini aýtdylar.

Türkmenistanyň Zenanlar birleşiginiň welaýat bölüminiň guramagynda welaýat häkimliginiň mejlisler jaýynda geçirilen dabaraly maslahat şu ýylyň «Garaşsyz, baky Bitarap Türkmenistan — bedew batly at-myradyň mekany» diýlip atlandyrylmagyna bagyşlandy. Oňa Türkmenistanyň Mejlisiniň deputatlary, jemgyýetçilik guramalarynyň, bilim, medeniýet, saglygy goraýyş, nebitgaz ulgamlarynyň işgärleri, mährem eneler, edara-kärhanalardaky ilkinji zenanlar guramalarynyň işjeň agzalary we talyp gyzlar gatnaşdylar.

Mälim bolşy ýaly, mukaddes Garaşsyzlygymyzyň şanly 35 ýyllyk baýramynyň dabaraly belleniljek ýyly Türkmenistanyň Mejlisiniň karary bilen «Garaşsyz, baky Bitarap Türkmenistan — bedew batly at-myradyň mekany» ýyly diýlip yglan edildi. Hormatly Prezidentimiziň türkmen halkyna Täze ýyl Gutlagynda: «Hoşniýetli arzuw-umytlar bilen garşy alýan täze ýylymyzda mukaddes Garaşsyzlygymyzyň şanly 35 ýyllygyny belläp geçeris. Watanymyzy bagtyýarlygyň we rowaçlygyň mekanyna öwürmek ugrunda yhlas bilen zähmet çekeris» diýip belleýşi ýaly, üstümizdäki ýyl hem ýurdumyzyň dünýä ýüzündäki abraý-mertebesini, şan-şöhratyny has-da artdyrjak ençeme taryhy wakalara beslener, halkymyzyň yhlasly zähmetiniň netijesinde ähli ugurlarda ýokary görkezijiler gazanylar. Çünki behişdi bedewler rowaçlygyň, rysgal-bereketiň, ösüşleriň nyşany bolup durýar.

Maslahatda çykyş edenler şular dogrusynda giňişleýin gürrüň edip, döwlet Baştutanymyzyň Watanymyzyň gülläp ösmeginiň, il-günümiziň ýaşaýyş-durmuş derejesiniň has-da ýokarlanmagynyň hatyrasyna alyp barýan beýik işlerine mynasyp goşant goşjakdyklaryna ynandyrdylar. Ata Watanymyzyň bedew bady bilen gülläp ösmegi, halkymyzyň nurana geljegi babatda taýsyz tagallalary edýän Gahryman Arkadagymyzyň we hormatly Prezidentimiziň janlarynyň sag, belent başlarynyň aman, işleriniň rowaç bolmagyny arzuw etdiler.

Soňra sungat ussatlarynyň aýdym-sazly çykyşlaryna giň orun berildi. Ýerine ýetirilen şirin owazly aýdym-sazlarda Watanymyzyň, döwrümiziň, ýylymyzyň şygarynyň waspy belentden ýaňlandy.

Arkadagly Gahryman Serdarymyzyň aladasy bilen welaýat häkimliginiň  jemagat hojalygy birleşiginiň düzümleri  üçin satyn alnan jemagat hyzmatlaryny ýerine ýetirmeklige ýöriteleşdirilen awtoulaglaryň hem-de tehnikalaryň gelip gowuşmagy jemagat hojalygynyň işgärleriniň durmuşynda şatlykly waka boldy.  Şu mynasybetli welaýatymyzda geçirilen dabaralar oňa gatnaşanlarda ýatdan çykmajak duýgulary döretdi.

Awaza etrap jemagat hojalygy müdirliginde geçirilen dabara welaýat, etrap, şäher häkimlikleriniň jogapkär işgärleri, Türkmenistanyň Mejlisiniň deputatlary, jemgyýetçilik guramalarynyň wekilleri, il sylagly ýaşulular, mährem eneler gatnaşdylar. Bu ýerde täze awtoulaglar we tehnikalar türkmen halkynyň milli däplerine laýyklykda, ak un sepilip, üzärlik tütedilip garşy alyndy. 

           Jemagat hyzmatlaryny ýerine ýetirmeklige ýöriteleşdirilen awtoulaglar we tehnikalar mukaddes Garaşsyzlygymyzyň 35 ýyllyk baýramçylygynyň dabaraly belleniljek  ýylynda welaýatymyzyň  etraplarydyr şäherlerinde amala aşyryljak arassaçylyk we abadanlaşdyryş işleriniň üstünlikli durmuşa geçirilmegi üçin örän zerurdyr. Şonuň üçin-de dabarada çykyş edenler bular barada buýsanç bilen gürrüň etdiler. Gelip gowşan döwrebap tehnikalaryň aýratynlyklaryny belläp geçdiler. Döwlet Baştutanymyzyň tagallalary netijesinde jemagat hojalygynyň düzümleri üçin ýurdumyza getirilen täze, döwrebap tehnikalaryň hatarynda zeý suwuny sorujy,  ýokary basyşda lagym ulgamlaryny arassalaýjy awtoulaglar, süpüriji-ýuwujy, zir-zibil ýükleýän, konteýnerli zir-zibil daşaýan, ýol germew we barýer ýuwýan ýöriteleşdirilen awtoulaglar, ýol ýuwujy-süpüriji kiçi maşynlar, agaç owradyjy, ýük göteriji, suw daşaýjy, ýol ýuwujy, göteriji enjamly kiçi ýol ýuwujy awtoulaglar we beýleki dürli işleri ýerine ýetirýän tehnikalar we goşmaça enjamlar bar. Hytaý Halk Respublikasynyň «Zoomlion», «Dongfeng» we «Infore Enviro» kompaniýalarynyň önümleri bolan döwrebap tehnikalar ilatly ýerlerde arassaçylyk we abadanlaşdyryş işlerini netijeli alyp barmaga giň mümkinçilikleri berýär.

             Dabarada  «Ga­raş­syz, ba­ky Bi­ta­rap Türkmenis­tan ­— ­bedew bat­ly at-myradyň me­ka­ny» ýylynyň ilkinji günlerinde gelip gowşan ýöriteleşdirilen awtoulaglar we tehnikalar üçin Gahryman Arkadagymyza  hem-de  Arkadagly Gahryman Serdarymyza hoşallyk we alkyş sözleri öwran-öwran dile getirildi.

Garaşsyz, hemişelik Bitarap Türkmenistan Watanymyzda bilim ulgamyny kämilleşdirmekde, onuň hil taýdan dünýä ülňülerine laýyk bolmagyny gazanmakda düýpli işler alnyp barylýar. Munuň oňyn netijeleri 2025 — 2026-njy okuw ýylynyň birinji ýarymynyň jemlenmegi we ikinji ýarymynda öňde durýan wezipeler mynasybetli geçirilen usuly-amaly okuwlarda, bilim işgärleriniň maslahatlarynda aýdyň ýüze çykdy.

Bilim işgärleriniň arasynda birnäçe gün dowam eden usuly-amaly okuwlarda «Türkmenistanda sanly bilim ulgamyny ösdürmegiň Konsepsiýasyndan», «Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasyndan» gelip çykýan wezipeleri üstünlikli durmuşa geçirmek bilen bagly sapaklar guralyp, çykyşlar diňlenildi hem-de özara pikir alşyldy. 

Balkanabat şäherindäki iňlis dili dersine ýöriteleşdirilen 25-nji orta mekdepde «Beýik işler bilime daýanýar, bilim bolsa terbiýe bilen geçmeli gymmatlykdyr» diýen şygar astynda maslahat geçirildi. Şäheriň bilim işgärleriniň maslahatynyň geçýän ýerinde guralan sergi hemmelerde uly gyzyklanma döretdi. 

Maslahatda okuw ýylynyň birinji ýarymynda bilim-terbiýe ojaklarynda ýaşlara döwrebap bilim bermekde, olary milli ruhda terbiýelemekde, kämil hünäriň eýeleri edip ýetişdirmekde alnyp barlan işlere seljerme berildi. Sanly bilim ulgamyny ösdürmegiň, daşary ýurt dillerini, tebigy we takyk ylmy ugurlara degişli dersleri okatmagy kämilleşdirmegiň usullaryny baýlaşdyrmakda öňde durýan wezipelere üns çekildi. Ýurt Garaşsyzlygymyzyň şanly 35 ýyllyk senesiniň giňden dabaralanjak «Garaşsyz, baky Bitarap Türkmenistan — bedew batly at-myradyň mekany» ýylynda bilim işgärlerine täze üstünlikler arzuw edildi. Türkmen halkynyň Milli Lideri Gahryman Arkadagymyza hem-de Arkadagly Gahryman Serdarymyza tüýs ýürekden çykýan alkyş sözleri aýdyldy.

Welaýat merkezi Balkanabat şäherindäki Baş baýdak meýdançasynda  geçirilen çäre täze, «Garaşsyz baky Bitarap Türkmenistan — bedew batly at myradyň mekany» diýip atlandyrylan 2026-njy ýyly mynasyp garşylamaga bagyşlanan dabaralaryň üstüni ýetirdi. Ir säher bilen welaýat we şäher häkimlikleriniň, edara-kärhanalaryň işgärleriniň, jemgyýetçilik guramalarynyň wekilleriniň, kümüş saçly eneleriň hem-de ýaşulularyň, ýaşlaryň gatnaşmagynda geçirilen çäre Döwlet senamyzyň belentden ýaňlanyp, mukaddes ýaşyl Tugumyzyň ýokary galdyrylmagy bilen başlandy. Ruhubelentlige beslenen baýramçylyk dabarasynda buýsançly çykyşlara uly orun berildi. Olarda bellenilişi ýaly, geçen ýylda halkymyzyň ýaşaýyş-durmuş derejesiniň has-da gowulanmagyna gönükdirlen belent maksatlar, ýurdumyzy gülledip ösdürmege gönükdirilen taryhy tutumlar rowaçlyklara beslendi. Bedew bady bilen ösüşiň täze belentliklerine tarap ynamly öňe barýan ýurdumyzda halkymyzyň eşretli durmuşy üçin taýsyz tagallalary edýän Gahryman Arkadagymyza, Arkadagky Gahryman Serdarymyza alkyş sözleri aýdyldy.

         Şeýle buýsançly çykyşlaryň dowamy baky Bitaraplygymyzy, täze taryhy eýýamyň beýik tutumlaryny wasp edýän aýdym-sazlara, joşgunly tanslara ulaşdy. Welaýatymyzyň sungat ussatlary ata-Watanymyzyň ösüşlerini, hormatly Prezidentimiziň alyp barýan beýik işlerini, gözel Diýarymyzy wasp etdiler. Berkarar döwletiň täze eýýamynyň Galkynyşy döwrüni, dost-doganlygy, eşretli durmuşymyzy wasp edýän döwrebap aýdym-sazlar alyslara ýaň saldy. Medeni çykyşlaryň dowamynda asuda asmanymyzy ak kepderiler, dürli reňkli şarlar bezedi.